Azərbaycan kubokunda 1/4 final mərhələsinin cavab oyunlarına start verilib.

"Qəbələ" "Qarabağ"ı üstələyib - 1:0. Matçdan sonra "qırmızı-qaralar"ın çalışdırıcısı Elmar Baxşıyevin mətbuat konfransı keçirilib. Sizi mütəxəssisin fikirləri ilə tanış edirik:

- Kubokda ən ciddi rəqibi mübarizədən kənarlaşdırdız. Avrokuboklara vəsiqə qazanmaq üçün çempionata, yoxsa kuboka önəm verəcəksiz?
- İndi nə mən, nə də komanda bu haqda düşünmür. Ən önəmlisi bu matçın həzzini çıxarıb, çempionatdakı sonuncu görüşə hazırlaşmaqdı. Çalışacağıq ki, hər iki turnirdə uğurlu olaq.

- Hesabda öndə olarkən meydana hücumameyilli oyunçular buraxdınız. Bunun səbəbi nə idi?
- Heyətimiz geniş deyil. Rövlan Muradovu müdafiəçi kimi oynatdıq. Əvəzetmələr məcburiyyətdən edilir. Ehtiyat oyunçular skamyasında lazım olan mövqeni dolduracaq futbolçular yoxdu. Amma komanda olaraq narahat deyilik. Kollektivin xarakteri var. bunu dəfələrlə göstəriblər.

- Heyətinizin geniş olmaması baş məşqçi olaraq sizi narahat etmir?
- Ümidli olmağa çalışırıq. Ümidsiz işləməyə dəyməz. Akakpa zədəsini sağaldıb kollektivə qoşulandan sonra rəqabətli komanda olacağıq. Amma transferlər də olsa, çox sevinərəm. Çempionat uzundu. Buna görə də ehtiyat oyunçular skamyası geniş olmalıdı.

- Rüfətlə Akakpo nə vaxt komandaya qoşulacaq?
- Akakpo bizimlə fərdi məşq edir. Ümidliyik ki, təlim-məşq toplanışında o da iştirak edəcək. Rüfətin isə fevral ayından sonra komandaya qoşulmağı gözlənilir.

- Növbəti mərhələdə "Sabah" - "Səbail" cütünün qalibi rəqibiniz olacaq. Kiminlə qarşılaşmaq istəyərdiz?
- O haqda düşünməmişik. Layiqli mübarizə aparsaq, hər iki turnirdə uğurlu ola bilərik. Bu komandanın potensialı ona imkan verir.

- Emil Səfərov son matçlarda yaxşı çıxış edir. Artıq onun əsas heyət üzvünə çevrildiyini düşünmək olar?
- Hələ inkişaf etməlidi. Emilin potensialı var. Hələ pik formasına çatmayıb. Yaxşı futbolçuya çevrilmək üçün üzərində çox çalışmalıdı.