Fransa millisi dünya çempionatı ərəfəsində daha bir oyunçusundan məhrum olub.
[b]
[b]"Football-plus.az" xəbər verir ki, komandanın liderlərindən Kərim Benzema da nəhəng turnirdə iştirak etməyəcək.

O, şənbə günü məşq zamanı zədələnib. Bir müddətdi zədədən əziyyət çəkən təcrübəli futbolçu bu dəfə omba nahiyəsindən xəsarət alıb. Onun Avstraliya ilə bu gün keçiriləcək matçı buraxacağı dəqiq idi. Lakin növbəti zədə 34 yaşlı forvardın mundialdan kənarda qalmasını qaçılmaz edib. Maraq üçün qeyd edək ki, Benzema 1978-ci ildən sonra mundialda oynamayan ilk “Qızıl top” sahibidi. 1977-ci ildə “Qızıl top” mükafatına layiq görülən Münhenqladbax “Borussiya”sının hücumçusu Allan Simonsenin üzvü olduğu Danimarka millisi DÇ-1978-in final mərhələsinə vəsiqə qazana bilməmişdi.

Baş məşqçi Didye Deşam Benzemanın əvəzinə yeni futbolçunu noyabrın 21-nə qədər heyətə cəlb edə bilərdi. Lakin o, 25 oyunçu ilə kifayətlənib. Təcrübəli çalışdırıcı heyətdə 8 hücumameyilli oyunçunun olduğunu əsas gətirib. Yeri gəlmişkən, Fransa millisində Presnel Kimpembe, Pol Poqba, Nqole Kante və Kristofer Nkunku da zədə səbəbindən mundialda iştirak etməyəcək.

Benzema nəhəng turniri buraxacağına görə məyusluğunu şəxsi “instaqram” hesabı vasitəsilə belə ifadə edib: “Həyatımda heç vaxt təslim olmamışam. Amma indi həmişə olduğu kimi komanda haqda düşünməliyəm. Ağlım mənə deyir ki, yerini yığmaya fayda verə biləcək oyunçuya verməlisən. Mənə mənəvi dəstək verən hər kəsə minnətdaram”.