“Mançester Siti” rəhbərliyi “Etihad” stadionunda yenidənqurma işləri ilə bağlı plan hazırlayıb. Bu planın yaxın gələcəkdə həyata keçirilməsi nəzərdə tutulub.

Böyük layihəyə İngiltərə klubunun ev oyunlarını keçirdiyi arenanın azarkeş tutumunun artırılması da daxildi. MS-nin mətbuat xidmətinin məlumatında bunun üçün layihənin texniki-iqtisadi əsaslandırılmasının aparıldığı bildirilib. Hazırkı azarkeş tutumu 53400 olan “Etihad”ın yenidənqurma işlərindən sonra azı 60000 yerlik olması planlaşdırılıb. Bu, Şimal tribunasının genişləndirilməsi hesabına mümkün olacaq. Həmçinin stadionda otel və muzeyin tikintisi də nəzərdə tutulub. Bundan əlavə, fan-zonaların sahəsinin artırılması və yeni klub mağazalarının açılması planlaşdırılır.

Qeyd edək ki, “Siti” ev oyunlarını “Etihad”da 2003-cü ildən keçirir.