Məlum olduğu kimi, premyer-liqa klublarının azarkeş qrupları komandalarının iki oyununa getməkdən imtina edib.

Football-plus.az xəbər verir ki, onların istəyi, tələbi isə budu ki, tribunada azarkeşlərə sərbəstlik, azadlıq verilsin. Artıq bir oyun - kubokun 1/4 final mərhələsinin ilk matçları geridə qalıb. Maraqlıdı, azarkeşlər növbəti görüşdən sonra yenidən tribunalara qayıdacaq, yoxsa bu müddəti uzatmaq haqda düşünürlər? Görəsən, onların futbol ictimaiyyətinin bu qərara verdiyi reaksiyaya münasibəti necədi? Bu suallarla iki azarkeşə müraciət etdik.

Elnur Quliyev (İmarət): “Hələ “İmarət”in bütün üzvləri ilə toplaşıb qərar verməmişik. Amma deyə bilərəm ki, onsuz da Azərbaycanda azarkeş azdı. Cavan uşaqlar əziyyət çəkib, vaxtını, pulunu sərf edib oyunlara gəlir. Bu müddəti şəxsi işinə də ayıra bilər. Ona görə belə bir kütləni incitmək, küsdürmək olmaz. Yeri gələndə xırda nüanslara göz yummaq lazımdı. Müsəlman ölkəsi Qətərdə dünya çempionatı keçirilir. Ölkənin qanunlarına görə bəzi məqamlar var ki, onları etmək olmaz. Lakin ölkə olaraq bəzi hallara da göz yumurlar. Çünki futbol, azarkeşlik azadlığı sevir. Onları çərçivəyə salmaq olmaz. Bir oyun da keçiriləndən sonra azarkeşlərimiz yenidən tribunalara dönəcək”.

Aqil Məmmədquliyev (“Neftçi”nin azarkeşlərlə əlaqələndiricisi): “Konkret deyim ki, bu məsələ ilə bağlı klubdan heç bir reaksiya görməmişik. Sadəcə, maraqlandılar ki, niyə baş verib? Yəni “səhv etdiz, düz etdiz, nəyə lazımdı” kimi söhbətlər olmadı. Həmçinin mediada. Onlar da, sadəcə, fikrimizi öyrəniblər, amma təhlil edən olmayıb. Mənə əsasən deyilən budu ki, “Qarabağ”ın azarkeşinin həbs olunmasının qarşısını almağa gücü çatmadı. Bu klubun rəsmiləri, rəhbərliyi hara baxırdı? Onlar bunu edə bilmədilər ki, biz də 2 oyunluq boykota əl atdıq. Bu düşüncə də müəyyən qədər qaranlıqdı. Lakin mən azarkeşlərin etirazına qarşı çıxmadım. Qərar verdilər, mən də dəstəklədim. Azarkeşlərin iki matçdan sonra yenidən tribunaya dönəcəyi ilə bağlı dəqiq məlumatım yoxdu. Amma hər halda, fanklub oyunları daim boykot etməz”.

ŞAİR ABDULLA