Mahir Şükürovdan qamqallı açıqlamalar: "Neftçi"ni bu günə salan veteranlarıdı"
"Neftçi"nin qara günləri davam edir. Komanda həm premyer-liqada, həm də kubokda qeyri-sabit çıxış edir.
"Football-plus.az" xəbər verir ki, "ağ-qaralar" ardıcıl 2 görüşdü ki, məğlub olur. flaqman premyer-liqanın 16-cı turunda "Qarabağ"a 0:4, Azərbaycan kubokunun 1/4 finalında isə "Zirə" 0:1 hesabı ilə uduzub. Bir sözlə, Bakı klubunda işlər qaydasında deyil. Bunun səbəbi nədi? Nəticələrə görə günahkar kimdi? Məsələ ilə bağlı fikirlərini səsləndirməsi üçün "ağ-qaralar"ın sabiq üzvü Mahir Şükürovla əlaqə saxladıq:
"Biabırçılıqdı. "Qarabağ"a, "Zirə"yə uduzmağın başqa adı yoxdu. Komanda 2 oyundu ki, qol vura bilmir. Günahkar axtarmağa gərək yoxdu. Ümumiyyətlə, baş məşqçi hara gəldiyini bilmir. "Neftçi"nin necə klub olduğunu dərk etmir. Gündə bir bəhanə gətirir. Əlbəttə ki, belə edəcək. O, "Neftçi"nin baş məşqçisi olmağa layiq deyil. Hərəkətləri, danışıqları, yaşadıqları qalmaqallar buna imkan vermir".
Millimizin sabiq üzvü klubun Müşahidə Şurasının sədri Rövşən Nəcəfə müraciət də etdi:
"Klubda islahatlar olacaq. Ordan-burdan biz də eşidirik. Bilirəm ki, Rövşən müəllim futbolu çox sevir. "Neftçi"yə də həddən artıq bağlıdı. Ondan xahiş edirəm ki, flaqmanda tarix yazan adamları işlə təmin etsin. Bizə şans yaratsın ki, "Neftçi"nin əzəmətini geri qaytaraq. Ümumiyyətlə, mən niyə klubda işləməməliyəm? Niyə idman direktoru olmayım? Elə futbolçular gətirərəm ki, indiki əcnəbilərdən 3 dəfə güclü. Hələ bu sahədə təcrübəm yoxdu. Amma indikilərdən daha yaxşı işlər görərəm. Rövşən müəllimdən xahiş edirəm ki, səsimizi eşitsin. "Neftçi"ni həqiqətən sevən insanlara güvənsin".
Mahir Şükürov veteranlara da söz atdı:
"Əsəbdən partlayıram, ay qardaş. "Neftçi"ni bu günə salan veteranlarıdı. Niyə danışmırlar? Çünki qorxurlar. Nədən, niyə? Mən bilmirəm. Onların yarıtmazlığı ucbatından "Neftçi"nin gənc veteranlarına da inanmırlar".
İLKİN SULTANLI
Digər xəbərlər
