Yazıçı futbola gələ bilir, futbolçu yazıçı ola bilmir? – Maşallah Əhmədov bu dəfə “Neftçi” rəhbərliyini...
“Neftçi”nin “Sumqayıt”da xal itirməsi “ağ-qaralar”ın veteran futbolçusu Maşallah Əhmədovu özündən çıxarıb.
Paytaxt təmsilçisinin Veteranlar İttifaqının rəhbəri redaksiyamızla əlaqə saxlayaraq fikirlərini bölüşmək istədiyini bildirdi. Maşallah bəy “Football-plus.az” saytına açıqlamasında bunları söylədi: “Yayda rəhbərlik Laurentsiu Regekampfı baş məşqçi postuna dəvət edəndə fikirləşdik ki, rumın mütəxəssisn gəlişi ilə “Neftçi” 85 illiyində “Qarabağ”la çempionluq uğrunda mübarizə aparacaq. Ancaq nə görürük? Komanda “Qarabağ”, “Sabah”a uduzmaqla yanaşı, artıq autsayderlə də bacarmır. “Sumqayıt”la görüşdə “Neftçi” uduzmalıydı. Sadəcə, bəxt sayəsində heç-heçə edə bildi. Belə biabırçılıq olar? Klub rəhbərliyinin fikri nədi, Müşahidə Şurası nə düşünür? Müşahidə Şurasında futbol adamları olmalıdı. Yenə deyirəm, Çingiz Abdullayevə, Fərhad Bədərbəyliyə ziyalı kimi böyük hörmətim var. Ancaq yaxşı olardı ki, onlar öz sahələrində fəaliyyət göstərərdilər. Futbol nə ədəbiyyatdı, nə də musiqi. Arada düşünürəm ki, Anara müraciət edib Yazıçılar Birliyinin üzvü olum. Yazıçı futbola gələ bilir, futbolçu yazıçı ola bilmir? Baş məşqçi və Müşahidə Şurasının üzvləri, klub rəhbərliyi istefa verməlidi. Bu gedişlə “Neftçi” mövsümün sonunda heç avrokuboklara vəsiqə qazana bilməyəcək. Vaxtında tədbir görülməlidi”.
Əhmədov “ağ-qaralar”ın 85 illik yubileyi ilə bağlı keçirilən tədbirə də toxundu: “Bu il “Neftçi”nin 85 illiyidi. Yubileylə bağlı bu yaxınlarda Neft Daşlarında klub rəhbərliyi ilə SOCAR-ın rəhbərliyi arasında yoldaşlıq görüşü keçirildi. Çox təəssüf ki, həmin tədbirə bir nəfər də olsun veteran dəvət olunmamışdı. Bu klubun keçmişinə xəyanət, hörmətsizlikdi. Veteranlar bir neçə dəfə klub rəhbərliyi ilə görüşmək istəsə də, hər dəfə "vaxt yoxdu” deyib, görüşdən yayınıblar. Əslində biz onlar bizimlə görüşdə maraqlı olmalıdılar. Ancaq əksi yaşanır”.
RƏŞAD
