"Şamaxı"nın müdafiəçisi Fuad Bayramovun "Football-plus.az"a müsahibəsi...

- Çətin "Sabah" səfərindən 1 xalla döndünüz. Görüşlə bağlı nə deyə bilərsən?
- Həftə ərzində oyuna ciddi hazırlaşmışdıq. Əlbəttə ki, bütün görüşlərə qələbə qazanmaq üçün çıxırıq. Bu matçda da qalib gəlmək istəyirdik. Təəssüflər olsun ki, bunu bacarmadıq. Amma "Sabah" kimi güclü komandadan səfərdə 1 xal ala bildik. Komanda yoldaşlarımı bu münasibətlə təbrik edirəm.

- Komandanın yeganə qolunu sən vurdun. Həmin epizod da bir az fərqli alındı. Səmimi olsaq, topu qapıya vururdun, yoxsa ötürmə edirdin?
- Düzünü deyəcəm. Epizodun əvvəlində ötürmə etmək istəyirdim. Sonra qapıçının əlverişsiz mövqedə olduğunu gördüm. Bundan istifadə edərək qapıya ötürməyə bənzər zərbə vurdum.

- 4 oyundu ki, məğlub olmursuz. 2 qələbə qazanıb, 2 heç-heçə etmisiz...
- Şükürlər olsun ki, məğlubiyyətsiz oyunlar seriyamız davam edir. Təbii ki, bu, bizə əlavə motivasiya verir. İnşallah, məğlubiyyətsiz oyunlarımızı davam etdirərik. Bizim uğurlu çıxışımız bütün şamaxılıların sevincinə səbəb olur. Bu da bizə əlavə güc verir.

- Növbəti tur Şamaxıda "Zirə"ni qəbul edəcəksiz. Bu görüşdə hədəfiniz nədi?
- Dediyim kimi, bu oyuna da qələbə üçün çıxacağıq. İnşallah, məğlubiyyətsiz görüşlər seriyamızı davam edər. Qarşıya qoyduğumuz hədəfimiz var. Qış fasiləsinə kimi maksimum xal yığmaq istəyirik. Bunun üçün də "Zirə" ilə oyunda qələbə qazanmalıyıq.

- Bizdə olan məlumata görə, səni "Qəbələ", "Səbail" və "Sumqayıt" transfer etmək istəyir. Bu, nə qədər doğrudu? "Şamaxı"nı tərk etmək istəyirsən?
- Hələ bu haqda düşünməmişəm. Qarşıda 2 oyunumuz var. İndi ancaq bu haqda düşünürəm. Qış fasiləsində kifayət qədər vaxtım olacaq. O zaman bu haqda düşünəcəm.

- Bu mövsüm 2 qol vurmusan, 7 məhsuldar ötürmüsən. Düşünürsən ki, bu göstəricilərə görə, səni yığmaya çağrılacaqsan?
- Əsas hədəflərimdən biri millinin şərəfini qorumaqdı. Buna ümid edirəm. Düşünürəm ki, növbəti toplanışa çağrılacam. Bu ümidlə öz üzərimdə daha çox çalışıram.

- Fuad, bu mövsüm uğurlu çıxış etməyinin səbəbi nədi?
- İlk növbədə ailəmin dəstəyi mənə motivasiya verir. Yerlilərim, dostlarım mənə güvənirlər. Onların inamını doğrultmağa çalışıram. İstəyirəm ki, oyunumla onlara sevinc bəxş edim. Heç olmasa mənə görə, üzlərində təbəssüm yaransın.

İLKİN SULTANLI