Srağagün E qrupunda hadisələr inanılmaz ssenari üzrə cərəyan etdi.

Noyerin 70-ci dəqiqədəki avtoqolu bu qrupdan Kosta Rikanı və paralel oyunda İspaniyadan üstün olan Yaponiyanı pley-offa çıxarırdı. Dünyanı silkələyəcək sensasiya cəmi 3 dəqiqə davam etdi, bundestim ardıcıl 3 qolla İspaniyanı xilas etdi, fəqət özü Aşqabad batan kimi batdı. “Qırmızı qəzəb”in yaponlar önə çıxandan sonra hesabı bərabərləşdirmək üçün fədakarlıq göstərməməsi, turnir strategiyası baxımından ifrat praqmatizmi dünyanın hər yerində olduğu kimi, ölkəmizdə də sosial şəbəkə əhlini ikiyə bölüb. İspaniyaya haqq qazandıranlar da var, lənətləyən və belə hoqqabazlığın irəlidə Luis Enrikenin komandasına baha başa gələcəyini deyənlər də!

Məsələyə sırf tarixi ədalət prizmasından yanaşsaq, dünyada yaşayan əlcəzairlilərin duaları, nəhayət, 40 ildən sonra Tanrı dərgahında eşidildi, yəni bundestim haqq etdiyi cəzanı aldı. Futbolla yaxından maraqlananlar bilir, amma bir daha xatırladım ki, 1982-ci il iyunun 25-də Xixonda inanılmaz rəzalət yaşandı. B qrupunda yer alan Almaniya ilə Avstriya Əlcəzairi məhv etdilər. O vaxt son turun oyunlar nəinki eyni saatda, heç eyni gündə də keçirilmirdi. İlk turda Almaniyanı 2:1 məğlub edən Əlcəzair ikinci oyunda Avstriyaya 0:2 uduzmuşdu. Əlcəzair iyunun 24-də Çilini 3:2 məğlub edəndən sonra Almaniya – Avstriya oyununun nəticəsini gözləməyə başladı. Bundestim 1 və ya 2 top fərqi ilə qələbə qazanacağı halda Avstriya ilə birgə - ilk iki yerin sahibi kimi növbəti mərhələyə adlayırdı. Hrubeş 10-cu dəqiqədə hesabı açdı, bundan sonra tərəflər 80 dəqiqə ərzində topu meydanda boş-boşuna dığırladılar, “qapını unutdular”. Təbii ki, qaydalar bu rəzalətə imkan verirdi, FİFA dərs çıxardı və DÇ-86-dan etibarən son turun oyunları eyni saatda başladı.

Yaxşı, ədalət zəfər çaldı və Almaniya 40 il əvvəlki əməlinin əvəzini ödədi. Almanların bəlalardan çox tez dərs çıxaran xalq olduğunu nəzərə alsaq, yəqin bir daha belə hoqqabazlıq etməzlər. İndi isə İspaniyanın bu məğlubiyyətlə əsaslandığı turnir strategiyasına baxaq. Qrupda 2-ci yeri tutan “qırmızı qəzəb” 1/8 final oyununu keçirmək üçün meydana dekabrın 5-də yox, 6-da çıxacaq, Xorvatiya yox, Mərakeş ilə qarşılaşacaq. İstirahət amilini və son iki komandanın gücünü nəzərə alanda çox usta gedişdi! Amma bu da son deyil. İspanlar bir güllə ilə iki də yox, üç dovşan vurub. Mərakeş üzərində mümkün qələbə o deməkdi ki, komanda turnirin aşkar favoritlərindən Braziliya ilə uzaqbaşı finalda qarşılaşa bilər. Bəs 3-cü dovşan hardadı? Artıq evində. İspaniyanın tarixən kubok komandası kimi məşhurlaşan bundestimi qrupda saxlamasını nəzərdə tuturam.

İspanların bilərəkdən uduzmadığını, sadəcə, yaponlara gücünün çatmadığını deyənlərin də öz dəlilləri var. Belələrinin əsas iddiası odu ki, bir komanda uduzanda da pley-offa çıxırsa, heç-heçə edəndə də, niyə can qoymalıdı, gücünü tükətməlidi? Və ya növbəti dəlillərə baxaq: elə bu İspaniya AÇ-2020-nin 1/8 finalında Xorvatiyanı 5:3 hesabıyla məğlub etmədimi, söhbət hansı qorxudan gedir? Nəhayət, qrup ikincisi olmaq İspaniyanı Fransanın yoluna çıxardı ki, “üçrənglilər”in də Braziliyadan zəif olduğunu iddia etmək çətindi. Bir sözlə, hər iki tərəfin özünəməxsus dəlilləri var. Söhbət tarixi ədalətin bərpasından gedirsə, Almaniya haqq etdiyi cəzanı alıb. Digər tərəfdən, İspaniya sırf turnir strategiyasına görə meydanda can qoymayıbsa, idman prinsiplərinə zidd davranıbsa, buna görə gec-tez cəzalanacaq. İndiki mənzərə belədi ki, “qırmızı qəzəb” dekabrın 6-da Mərakeşə uduzub mübarizəni dayandırsa, buna təkcə Almaniya yığmasının azarkeşləri yox, milyonlarla neytral futbolsevər də sevinəcək və bayram edəcək.

Sonda daha bir məqamı vurğulamaq istəyirəm. İspanlar təkcə futbolda yox, basketbolda da dəfələrlə belə hoqqabazlıq ediblər. Məsələn, ABŞ və Fransa ilə qarşılaşmamaq üçün istədikləri hesabla uduzublar. Futbol tarixi AÇ-84-ün seçmə mərhələsinin İspaniya – Malta oyununu da unutmayıb. Məhz ispanların 12:1 hesablı qələbəsi üzündən Niderland qitə birinciliyinə yollana bilmədi. Odu ki, yaxın gələcəkdə sərlövhəyə çıxardığım “nə tökərsən aşına, o da çıxar qaşığına” məsəli ispanların üzərində təsdiqini tapsa, heç kim təəccüblənməsin. Bu dünyada hər şey bumeranq effektlidi!

HÜŞƏNG