“Atlanta”nın oyun qurucusu Trey Yanq MBA-nın 2021/22 mövsümü üçün rəmzi yığmasına düşməsə, nəhəng maliyyə bonusundan məhrum ola bilər.

Müqavilə şərtlərinə görə, o, bu halda 35 milyon dollar itirəcək. Xatırladaq ki, apreldə 100 idman jurnalistinin səsverməsi yolu ilə MBA-nın üç rəmzi komandası müəyyənləşəcək.

Mövsüm sona yaxınlaşdıqca pley-off iştirakçılarının siyahısı da müəyyənləşməkdədi. Srağagün “Klivlend”i məğlub edən “Dallas” ardıcıl 3-cü dəfə pley-offda oynamaq haqqı qazandı. Komanda hazırda Qərb konfransında turnir cədvəlinin 4-cü pilləsində qərarlaşıb.

Elə “Mayami” də ardıcıl 3-cü dəfə pley-offda oynayacaq. Son oyunda “Boston”u məğlub edən “Hit” Şərq konfransının turnir cədvəlinə başçılıq edir. Pley-offa vəsiqə qazanan növbəti komanda “Boston”du. “Seltiks”in ardıcıl 8-ci dəfə həlledici mərhələdə oynayacağı “Klivlend”in “Atlanta”ya dünənki məğlubiyyətindən (107:131) sonra dəqiqləşdi. “Boston” sonuncu dəfə 2014-də pley-offda oynaya bilməyib.

“Leykers”in qara günləri davam edir. “Yuta” önündəki dünənki məğlubiyyət “gölməçəsevərlər”in pley-in şansını azaltdı. Son 6 oyunun 5-də uduzan “Leykers”in vəziyyəti düzəltmək üçün irəlidə daha 6 oyunu var.