Yalnız yerli futbolçulardan qurulan “Şamaxı” son vaxtlar ən çox gündəmdə olan komandalardandı.

Çoxları düşünürdü ki, bu komanda çempionatda qələbəyə həsrət qalacaq. Lakin ardıcıl üç oyunda uduzmayan “şirlər” artıq turnir cədvəlinin 7-ci pilləsində qərarlaşıb. Təbii ki, rəhbərliyin də işini unutmaq olmaz. Futbolçular üçün yaxşı şərait qurublar, bütün çətinliklərini həll etməyə çalışırlar. Görəsən, “Şamaxı”nın gələcəklə bağlı hansı planları necədi, komanda qışda güclənəcəkmi? Bu və başqa məsələlərə aydınlıq gətirmək üçün klubun baş meneceri Kamran İsmayılovla söhbətləşdik...

- “Şamaxı” ardıcıl iki görüşdə qələbə qazanmışdı. “Kəpəz”lə bugünkü oyunda da qələbə gözləyirdiz?
- Əslində hər iki rəqib qələbə qazana bilərdi. Əvvəlcədən bu görüşün taleyinin bir qolun həll edəcəyini söyləmək olardı. Lakin nəticə mübarizəyə görə oldu. Hər iki komanda 1 xala layiq oyun sərgilədi.

- “Şamaxı” premyer-liqada legionersiz çıxış edən yegənə komandadı. Klub əvvəlcə mövsümün ilk hissəsində belə çıxış edəcəyini açıqladı. Daha sonra İdarə Heyəti qərarı cari “futbol ili”nin sonuna kimi uzatdı. Bəlkə də alqışlanası nüansdı. Mənə maraqlıdı ki, bu təklif ilk dəfə kimdən gəldi?
- Tez-tez rəhbərliyin toplantıları olur. Orda belə fikir səsləndi. Lakin təklifin kimdən gəlməsi o qədər də önəmli deyil. Əsas odu ki, komanda hazırda yaxşı çıxış edir. Fikrimizi həyata keçirdiyimizə görə şadam.

- Qış fasiləsinə az qalıb. Komandanın güclənməsi üçün hansı addımlar atılacaq? Nəzərə alaq ki, futbolçu seçiminiz məhduddu...
- Bunu biz də bilirik. Bu səbəbdən də indidən danışıqlara başlamışıq. Çalışacağıq ki, komandanı yetərincə gücləndirək. Əlimizdə daxili bazar var. Ölkə xaricindən futbolçuların transfer edilməsi o qədər də asan deyil. Bu səbəbdən də ancaq yerli çempionatdan “Şamaxı”da oynamaq istəyən futbolçuların transferinə çalışacağıq.

- Bəs sizin futbolşularla maraqlananlar var?
- 2-3 oyunçumuz haqda məlumat toplayıblar. Hələ fasiləyə çox var. Nələrin baş verəcəyini zaman göstərəcək. Çalışacağıq ki, kollektivimizi qoruyaq. Amma ciddi transfer təkliflərini də dəyərləndirəcəyik.

- Güclənməyin əsas yollarından biri də normal təlim-məşq toplanışı keçməkdi. Bu istiqamətdə hansı planlarınız var?
- Doğru buyurursuz. Komandanın normal çıxışı üçün yaxşı təlim-məşq toplanışı keçirilməlidi. Biz də bu haqda düşünmüşük. Qışda qardaş Türkiyənin Antalya şəhərinə yollanacağıq. Yanvarın 4-dən 18-nə kimi orda olacağıq. Bu 14 gün ərzində 4 yoxlama görüşündə də qüvvəmizi sınayacağıq. Rəhbərlik çalışır ki, komanda üçün hər cür şərait qurulsun və yaradılsın.

- Gəlin problemlərdən də danışaq. Stadionun işıqlandırma sistemi yoxdu.
- Bunu bilirik. Amma arena bizim deyil. Biz AFFA-dan buranı icarəyə götürmüşük. Lakin bunun problem olduğunu bilirik. Məsələ o qədər də qəliz deyil. Yay aylarında axşam saat 16.00 və ya 17.00-da oyunlarımızı keçiririk. Qışa doğru 15.00, 14.00-da matçlarımız başlayır. Ola bilər ki, qışa doğru PFL saat 13.00-a da təyin etsin. Lakin mənə görə futbol üçün ən ideal vaxt 19.00-dı. Amma nə edək ki, belə problemimiz var. Bunun həlli bizdən asılı deyil. Gələcəkdə hansısa dəyişikliklər ola bilər. İndi üçün isə bu, mümkün deyil.

- Ot örtüyünün suni olması həm sizin komandaya, həm də rəqiblərə zərər verir.
- Biz də istəyərdik ki, təbii ot örtüklü arenamız olsun. Amma bu da işıqlandırma sistemi ilə eyni problemdi, həlli bizdən asılı deyil.

- Amma akademiyanın fəaliyyəti sizdən asılı məsələdi. Burdakı komandaların çoxu Bakıda məskunlaşıb. Bu məsələ nə vaxt həll olunacaq?
- U-10-dan U-13-ə kimi komandalarımız burda qərarlaşıb. Bilirsiz, təzəlikcə Bakıdan Şamaxıya köçmüşük. Hansısa uşağı və valideynini məcbur edə bilməzdik ki, bura gəlsinlər. Biz də belə düşündük ki, hər il yeni bir komanda fəaliyyətə başlasın. Gəlin il yenə U-10 fəaliyyətə başlayacaq. Bizim U-19 komandamızdan oyunçular ya əsas, ya da əvəzedici heyətdə, bəlkə də başqa klublarda çıxış edəcəklər. Çalışacağıq ki, həmin komandanı Şamaxıda məskunlaşdıraq. Beləliklə, ümumilikdə maksimum 3-4 ilə akademiyamız bütövlüklə Şamaxıda fəaliyyət göstərəcək. Yenə deyirəm, bu bizdən asılı problem deyildi. Çünki son 30 ildə Şamaxıda futbol yox idi. Belədə çətinliklərə də sinə gəlməliyik. Hər şey zamanla həllini tapacaq.

- Maliyyə məsələ ilə bağlı hansısa problem var?
- Xeyr! Hər şey qaydasındadı. Ümid edirik ki, heç bir problemimiz də olmayacaq.

- Dövlət tərəfindən ayrılan 3 milyon manatın hamısı kluba xərclənir?
- Bəli! Amma kluba tam xərclənir, ancaq əsas komanda üçün ayrılmayıb. Bilirsiniz ki, akademiyaya da pul xərcləmək lazımdı. Biz həm əsas heyətə, həm əvəzedicilərə və aşağı yaş qruplarına bu maliyyədən xərcləyirik.

İLKİN SULTANLI