Nigeriyalı futbolçu Peter Oluka karyerasını "Neftçi"də davam etdirməyə yaxındı.

Xəbəri bu ölkənin mətbuatı yayıb. Paytaxt təmsilçisi "36 Lion"da çıxış edən oyunçuya təklif göndərib. "Ağ-qaralar" Olukanı bir müddət öncə keçirilən "Caqaban kuboku"nda bəyənib. 22 yaşlı yarımmüdafiəçi turnirin ən yaxşı oyunçusu seçilib. "Neftçi" onu baxışa da dəvət edib. Afrikalı artıq Bakıya yollanıb.

Əsl mövqeyi dayaq yarımmüdafiəçisi olan, orta sahədə və müdafiənin sol cinahında da oynamağı bacaran Peter ölkəsində yüksək texnikaya, ötürmə qabiliyyətinə və topla sürətli davranışına görə perspektivli gənclərdən sayılır. Nigeriyalılar “Neftçi”nin məşqçilər korpusunun onun çıxışına heyran qalacağını düşünür. Oluka ötən il iki ay Moldova “Kodru”sunda çıxış edib.

Görəsən, flaqman həqiqətən bu futbolçu ilə maraqlanır. 22 yaşlı yarımmüdafiəçi nə vaxt ölkəmizdə olacaq? Onun baxışa dəvət edilməsini kim istəyib? Laurentsiu Regekampf Peterin oyununu bəyənib, yoxsa rəhbərlik Mamadu Kane ilə bağlı uğurlu siyasəti davam etdirmək niyyətindədi? Suallarımıza cavab tapmaq üçün klubla əlaqə saxladıq. “Neftçi”nin Media, Marketinq və İctimaiyyətlə Əlaqələr Departamentinin rəhbəri Rüstəm Allahverdiyev qısa və konkret cavabla kifayətləndi: “Biz heç kimi baxışa dəvət etməmişik. İnformasiya yanlışdı”.

“Neftçi” ilə bağlı maraqlı informasiyalar yayılır. Bunlardan biri də klubun büdcəsiylə bağlıdı. SOCAR-ın “ağ-qaralar”ın güclənməsini istəməsiylə haqda informasiyanı ötən saylarımızın birində diqqətinizə çatdırmışdıq. Bu məsələ ilə bağlı redaksiyamıza maraqlı məlumat daxil olub. Sən demə, şirkət rəhbərliyi klubun sabit şəkildə çempionluğa oynamasını və avrokubokların qrup mərhələsində mübarizə aparmasını istəyir. Bu səbəbdən də klubun idarəetmə sistemini dəyişəcək. Söhbət rəhbərliyin göndərilməsindən getmir. Hazırkı klub prezidenti Kamran Quliyev vəzifəsində qalacaq. SOCAR rəsmiləri ona güvənir. Bu səbəbdən də Quliyevin rəhbərliyi altında yeni futbol məktəbi layihəsinə start verilib. Klubun Bakının qəsəbələrində və rayonlarında filialları olacaq. Kəsəsi, klub rəhbərliyi şəhərin futbol üzrə əsas brendi olmağı planlaşdırır. Şirkətin icazəsi və xeyir-duası olmadan bu addım atıla bilməzdi.

Əsas dəyişiklik klubun büdcəsi ilə bağlıdı. İndiki halda flaqmanın maliyyəsi yay aylarında təsdiqlənirdi. Bu da transfer prosesinin gec başlamasına səbəb olurdu. İndi isə büdcə yanvarda, yəni dövlət şirkətlərinin hesabat təqdim etdiyi vaxtda təsdiqlənəcək. Maliyyənin artımı ilə bağlı da məlumat əldə etmişik. Büdcənin gəzən söz-söhbətlərdəki qədər, yəni 50 milyon manat olması gözlənilmir. Şirkət bununla bağlı hələ ki yekun qərar verməyib. Lakin yeni alt sponsorların cəlb olunması üçün işlər başladılacaq ki, “Neftçi” daha da güclənsin.

Görəsən, məlumat nə qədər doğrudu? Həqiqətən də “Neftçi”də dəyişikliklər olacaq? Məsələ ilə bağlı Rüstəm Allahverdiyevin fikri belə oldu: “Bizdə klubun büdcəsinin təsdiqlənməsi ilə bağlı hansısa məlumat yoxdu. Bu proses həmişə mayda gerçəkləşir”.

İLKİN SULTANLI