“O matçda Yaponiyanın start heyətinə baxsaq, görərik ki, yalnız qapıçı və cinah müdafiəsi öz ölkəsində top qovur. Qalan oyunçular Almaniyada və Avropanın başqa önəmli çempionatlarında çıxış edir. Yaponların zatən istedad baxımından heç vaxt problemi olmayıb. İndi isə bu istedadlar həm də Avropada mənimsədikləri sistemdən, oyun intizamından öz yığmalarında çox gözəl faydalanırlar. Almaniya oyuna yaxşı başladı və uzun müddət matçın axarına nəzarət etdi. Amma sonunu gətirə bilmədi. Onlar intriqanı erkən öldürə bilmədilər. Ən həlledici məqam məhz budu. Belə turnirlərdə və belə oyunlarda favorit komandalar hesabda önə keçdikdən sonra ikinci qolu da vurub rəqibin ümidlərini tamə puç etməyi bacarmalıdı. Bunu edə bilmirsənsə, ən azı əlindəki üstünlüyü qoruya bilməlisən. Almaniyanın 1:0-dan sonra fürsətləri var idi. Onları qola çevirmək mümkün olmayınca, Yaponiya da ümidlənməyə, hər ötən dəqiqə daha cəsarətli oynamağa başladı. Onlar oyunu çevirə biləcəklərinə inandılar və 2 qol vurdular. Yaponiya son 20 dəqiqədəki oyunla göstərdi ki, artıq dünya futbolunda laqeydliyə və vaxtından əvvəl rahatlaşmağa yer yoxdu! Düzdü, bundestim bu nəticə ilə pley-off şansını əhəmiyyətli dərəcədə azaltdı. Amma digər tərəfdən, Almaniya turnir komandasıdı və tarixdə dəfələrlə bunu sübut edib. Bu oyun onlar üçün böyük bir dərs olacaq. Bir oyundan sonra almanların üstündən xətt çəkmək çox tezdi. Bu turnirdə hələ ki sistem baxımından bir yenilik görməmişəm. 1-ci turda Səudiyyə Ərəbistanının və Yaponiyanın qələbəsindən başqa ciddi bir sürpriz olmadı. Komandaların çoxu standart şəkildə çox kompakt oynayaraq və müdafiədən hücuma sürətli çıxaraq qol vurmağa çalışırlar. Hər ölkənin, təbii ki, müəyyən özəllikləri var. Bunu ən yaxşı İspaniya sərgilədi. Heyətdə bir çox gənc oyunçunun yer almasına rəğmən, ispanlar yenə özlərinəməxsus futbol ortaya qoydular. Komandalar ilk turda təmkinli oynamağa çalışdılar. Qolsuz matçların çox olması da bunun göstəricisidi”.