Cokoviç özünü hamıdan yaxşı sayır
Turində keçirilən ATP-nin illik yekun turniri Novak Cokoviçin qələbəsi ilə başa çatdı.
Serb tennisçi finalda norveçli Kasper Ruudu 7:5, 6:3 hesabıyla məğlub etdi. 35 yaşlı ulduz tarixə üç onillikdə yekun turnirdə qələbə qazanan ilk tennisçi kimi düşdü. O, buna qədər 2008, 2012, 2013, 2014 və 2015-ci illərdə də qələbəni bayram etmişdi. İllik yekun turnirlərdə 6-cı dəfə zirvəni fəth edən və bu göstəricidə isveçrəli Rocer Federerə çatan Cokoviç finaldan sonra maraqlı açıqlama verdi: “
Reytinq kimin ən yaxşı mövsüm keçirdiyini göstərir. Alkaras dünya sıralamasında birincidi. Burda başqa nə deyəsən?! Ancaq mən özümü həmişə dünyanın ən yaxşı oyunçusu sayıram. Mənim mentallığım, yanaşmam belədi Rəqibin kimliyindən, örtüyün necəliyindən, neçənci mövsüm keçirməyimdən asılı olmayaraq, heç nə dəyişmir. Ambisiyalarım maksimal dərəcədə yüksəkdi”.
Turnirin heç bir oyununda uduzmadığını nəzərə alsaq, Cokoviç Turindəki çıxışına görə 4 milyon 740 min 300 dollar qazanıb ki, bu da tennis yarışları üçün rekord məbləğdə mükafatdı. Yekun turnirinin ardından dünya tennisçilərinin ənənəvi həftəlik reytinqi də açıqlanıb. Kişilərin ilk “10-luğ”unda müəyyən yerdəyişmələr olub. Ruudla Sisipas yerini dəyişib, Medvedev 7-ci pilləyə enib, Cokoviç ilk “5-liy”ə daxil olub, danimarkalı Holger Rune 10-cu yeri Hubert Hurkaça təhvil verməli olub.
