Cokoviç gedəndə anası ağlayacaq
İsrailin paytaxtı Təl-Əvivdə keçirilən tennis turnirinə oktyabrın 2-də yekun vurulub.
Novak Cokoviç finalda Marin Çiliçi məğlub etməklə (6:3, 6:4) karyerasında 89-cu, cari mövsümdə 3-cü titulu qazanıb.
35 yaşlı serb tennisçi finalın ardından maraqlı açıqlama verib:
“Yəqin ki, karyeramı bitirəndə anam göz yaşı tökəcək. İdmandan getməyə yaxın deyiləm, bu haqda çox düşünmək istəmirəm. Rocer Federer Leyver kubokuna qatıldı və karyerasını möhtəşəm şəkildə bitirdi. Onunla vidalaşmaq üçün hamımız ordaydıq. O, belə xüsusi tədbirlə yola salınmağa layiq idi, belə münasibəti haqq etmişdi. Bir məqamı dəqiq bilirəm: mən də istəyirəm ki, dahi rəqiblərim vida mərasimimə qatılsınlar”.
Rus əsilli Almaniya təmsilçisi Aleksandr Zverev isə Cokoviçin yenidən dünyanın 1 nömrəli raketkası ola biləcəyinə şübhə ilə yanaşır:
“Novakın indiki idman formasına baxsaq, üç-dörd il də oynaya bilər. Novak kimi həm kortda, həm də onun hüdudlarından kənarda hər şeyi düzgün edirsənsə, yaş yalnız rəqəmdi. Bilmirəm ki, onun yenidən 1 nömrə olması mümkündümü?”
Xatırladaq ki, Cokoviç “Böyük dəbilqə” turnirlərini 21, “ATP Masters” seriyalı turnirləri isə 38 dəfə qazanıb.
Bu arada Karlos Alkaras dünyanın 1 nömrəli tennisçisi statusunu daşıması haqda danışıb:
“İspaniya tarixinin bir hissəsi olmaq mənim üçün böyük əhəmiyyət daşıyır. Zirvədə iki oyunçunun olması möhtəşəmdi. Mənə elə gəlir ki, ilin əvvəlində əsas hədəfimin “top-15”ə düşmək olduğunu demişdim, indi isə artıq 1 nömrəyəm. İlin sonuna qədər bir neçə yaxşı turnirə qatılacam. Hədəfim həmin turnirlərdə də özümü ən yaxşı tərəfdən göstərməkdi. Belə tez dünyanın 1 nömrəli tennisçisi olacağımı heç vaxt düşünməmişdim”.
Bildiyiniz kimi, Alkaras tarixə ən gənc 1 nömrəli tennisçi kimi düşüb. O, indiyə qədər bir dəfə “Böyük dəbilqə” turnirini qazanıb, eləcə də ATP seriyalı 6 turnirin qalibi olub.
