"Futbol dayanmadan inkişaf edən idman növüdü. Buna rəğmən, hazırda heç də bütün oyunlarda 90 dəqiqə meydanda futbol görmürük. Matçboyu təxminən 40-45 dəqiqə aut, künc zərbələri, zədələnmələr, futbolçuların vaxtı uzatmaq üçün yerdə qalması, oyunçu dəyişikləri və sairə vaxt sərf olunur. Türkiyə çempionatında belə hallara tez-tez rast gəlirik. Dünən baş tutan İngiltərə - İran qarşılaşmasında cənub qonşumuzun qapıçısının zədələnməsi, sonradan əvəzlənməsi xeyli vaxt apardı. Ona görə də sırf itirilən vaxtı bərpa etmək üçün ilk hissəyə 14 dəqiqə əlavə olundu. Fikrimcə, bu üzdən itirilən dəqiqələrin “sığortalanması” yaxşı haldı. Çünki komandaların, futbolçuların özünü göstərməsi, nəticəni dəyişmək məqsədiylə irəli atılması üçün ayrıca motivasiyadı. Məsələyə azarkeş prizmasından da baxmaq lazımdı. 500 dollarından keçib oyuna baxmaq üçün gələn yerdə uzanaraq “vaxt öldürən” futbolçulara baxmaqdan zövq almayacaq və digər oyunlara gəlməyəcək. İtirilən vaxtın bu şəkildə bərpası azarkeşlərin futboldan maksimum zövq almasına da hesablanıb".