DÇ-nin təşkilatçıları Platiniyə dəvət göndərməyib
Bu gün Qətərdə dünya çempionatı start götürüb.
Belə görünür, bu cür nəhəng turnirin Qətərə verilməsində ən böyük əməyi olanların başında gələn Mişel Platini matçları televizordan izləməli olacaq. Çünki təşkilatçılar ona heç bir dəvət göndərməyiblər. Bunu UEFA-nın sabiq prezidenti özü ''Ekip'' nəşrinə açıqlamasında bildirib:
''Mənə heç kim heç bir dəvət göndərməyib. Düzdü, bəzi media qurumlarından dəvət almışam. Amma Qətərə yollanmaq niyyətim yoxdu''.
Xatırladaq ki, 2007-15-ci illərdə UEFA-nın prezidenti vəzifəsini icra etmiş Platininin sonradan rüşvət məsələsi üstündə nüfuzuna böyük xələl gəlmişdi. DÇ-2018 və DÇ-2022-nin ev sahibinin seçilməsi məsələsi ilə bağlı maxinasiyalarda günahlandırılan Platini bir ara həbs olunsa da, sonradan azadlığa buraxılmışdı. Bu yaxınlarda FİFA-nın sabiq prezidenti Yozef Blatter etiraf etmişdi ki, DÇ-2022 əslində ABŞ-da keçirilməli idi və Qətərin qalib gəlməsində məhz Platininin çox böyük rolu olmuşdu.
Digər xəbərlər
