Blatterdən sensasiyon açıqlama: ''DÇ-2022 Qətərə yox, ABŞ-a verilməli idi!''
Dünya çempionatının Qətərə verilməsi hələ də birmənalı qarşılanmır.
Baxmayaraq ki, turnirin startına 2 həftədən də az vaxt qalıb. Futbol dünyasından bir çox ismin bu mövzu ilə bağlı tənqidi fikirlər səsləndirdiyi bir məqamda FİFA-nın sabiq prezidenti Yozef Blatter sensasiyon açıqlamalar verib. 1998-2015-ci illərdə quruma rəhbərlik etmiş Blatter DÇ-nin Qətərə verilməsinin yanlış olduğunu bildirərək hər şeydə UEFA-nın sabiq prezidenti Mişel Platinini günahlandırıb. Uzun illər korrupsiyada günahlandırılan 86 yaşlı Blatterin bu ilin əvvəlində günahsız olduğu sübuta yetirilsə də, prezidentliyi dönəmində FİFA-nın etika kodeksinə zidd bir sıra hərəkətlərə yol verdiyi üçün onun 2027-ci ilə qədər futbol fəaliyyəti ilə məşğul olmasına qadağa qoyulub. Blatter vətəni İsveçrədə işıq üzü görən ''Tages Anzeiger'' nəşrinə bunları deyib: ''DÇ-2022-yə ev sahibini seçərkən biz faktiki olaraq üstünlüyü ABŞ-a vermişdik. 2018-də turniri Rusiya keçirdikdən sonra 2022-də ABŞ ev sahibi olmalı idi. Bu, siyasi arenada rəqib olan iki böyük ölkə üçün dünyavi bir jest olacaqdı. Qətər balaca ölkədi. DÇ belə bir ölkə üçün hədsiz dərəcədə böyük bir turnirdi. Qətər yanlış seçimdi. O vaxt seçimə görə mən məsuliyyət daşıyırdım və səhvə yol verdiyimi etiraf edirəm. Amma artıq nəyisə dəyişmək mümkün deyil. FİFA-nın 2010-cu ildəki konqressindən bir həftə öncə Platini mənə zəng vurdu və planımızın baş tutmayacağını dedi. Çünki yenicə Fransa prezidenti Mişel Sarkozi ilə söhbət edibmiş. O da öz növbəsində bundan bir neçə gün öncə Qətər şahzadəsi ilə görüşüb çörək yeyibmiş. Sarkozi görüşdə Platiniyə ''baxın görün, siz və UEFA-dakı dostlarınız DÇ-yə ev sahibi seçimi zamanı Qətərə nə cür köməklik edə bilərsiz'' deyibmiş. Platini mənə ''Zepp, ölkə prezidenti səndən nə isə xaiş etsə, nə reaksiya verərsən'' tipli bir sual ünvanladı. Mən isə cavabımda bu sual barədə düşünmədiyimi dedim. Çünki bizdə İsveçrədə prezident yoxdu. Sonda hər şey onun planlaşdırdığı kimi oldu. Platini və UEFA-dakı deleqatların 4 səsi həlledici oldu. Yekunda mundial ABŞ-a yox, Qətərə qismət oldu. Təbii ki, ortada həm də böyük pullar oynayırdı. Yarım ildən sonra Qətər Fransadan 14,6 milyard avro dəyərində döyüş təyyarələri aldı. Mənə maraqlıdı ki, FİFA-nın indiki prezidenti (Canni İnfantino) nə üçün Qətərdə yaşayır? O, DÇ-nin təşkilat komitəsinin rəhbəri ola bilməz. Bu, onun işi deyil! Bunun üçün iki ayrı təşkilat var. Biri Qətərin özündə, biri də FİFA-da. Hər şeyə rəğmən şadam ki, xırda istisnaları saymasaq, heç bir futbolçu qarşıdakı mundialı boykot etmək fikrində deyil''.
Digər xəbərlər
