Tez-tez idman və xüsusilə də futbol mövzusunda filmlər ərsəyə gətirən, ən son Fatih Terim haqda 4 hissəli sənədli film çəkən dünyanın ən populyar digital platforması sayılan ''Netfliks'' yenə futbol mövzusuna müraciət edib.

Amma bu dəfə söhbət futbolun başında oturan insanların pula hərisliyi, rüşvət və korrupsiyaya göz yummasından gedəcək. Belə ki, ''Netfliks'' FİFA-nın sabiq prezidenti Yozef Blatter ilə UEFA-nın sabiq prezidenti Mişel Platininin çirkin əməllərini göstərən sənədli film çəkib. Film noyabrın 9-da ekranlara çıxacaq. Filmdə Blatterin 2011-ci ildə qanunsuz şəkildə Platininin hesabına 2 milyon dollardan çox pul köçürməsi və digər qalmaqallı məqamlar yer alır. Xatırladaq ki, 2015-ci ildə aparılan araşdırmalardan sonra onların hər ikisi uzun müddətə futboldan kənarlaşdırılmışdı.