Qətərin kral ailəsi DÇ-2022-nin startına iki gün qalmış FİFA-dan stadionlarda pivə satışının tam yığışdırılmasını tələb edib. Ali futbol təşkilatı bu tələbi müsbət cavablayıb.


Football-plus.az xəbər verir ki, Böyük Britaniyada çıxan “The Times” qəzetinin məlumatına görə, Qətərin hakim Əl-Tani ailəsi dünya çempionatının başlamasına 48 saat qalmış FİFA-nı çox çətin vəziyyətə salıb. Ailənin üzvləri turnirin oyunlarının keçiriləcəyi 8 stadionda pivə satışını dayandırmağı tələb ediblər. Qeyd edək ki, pivə istehsalçılarına məhsulunu satmaq və ya onu matçlarda nümayiş etdirmək icazəsi verilməyəcəyi halda, FİFA bir neçə milyon dollarlıq müqaviləni pozmalı olacaqdı. Ali qurum artıq Qətər hakimiyyətinin məsələ ilə bağlı tələbini qəbul edib. Beləliklə, mundial zamanı stadionlarda pivə, ümumiyyətlə, spirtli içki satışı olmayacaq. Futbol azarkeşləri üçün pivənin mütləq olacağı yeganə yer fan-zonalardı.