Qətərdə keçiriləcək və böyük səbirsizliklə gözlənilən dünya çempionatının başlamasına 2,5 ay qalıb.

Bu arada FİFA mundial üçün spirtli içkilərlə bağlı yeni qərar qəbul edib. Ümumiyyətlə bu məsələ Qətərə yollanmağı planlaşdıran futbolsevərlər arasında ciddi müzakirələrə səbəb olmuşdu. Çünki spirtli içki qəbulu və satışı ilə bağlı ölkədə qadağalar mövcuddu. Düzdü, bu qadağalar qonşu ölkələr – Yəmən, Sudan, Livan, Küveyt və Səudiyyə Ərəbistanı ilə müqayisədə daha yumuşaqdı. Qətərdə qadağa əsasən yerli əhali üçün mövcuddu. Əcnəbilər isə dükanlardan çətinliklə də olsa, spirtli içki tapa bilirlər. FİFA bu məsələnin necə tənzimlənəcəyinə aydınlıq gətirib. Oyunların gedişində stadionda pivə satışı olmayacaq. Amma oyunlardan əvvəl və sonra stadionların ətrafında içki qəbuluna icazə veriləcək. Bir FİFA rəsmisi ''Deyli Meyl''ə verdiyi açıqlama qeyd edib ki, DÇ vaxtı satış həyata keçirmək icazəsi olan içki markaları stadionların ətrafında stendlər quracaqlar. Hər stend oyundan yarım saat əvvəl bağlanacaq. Final fitindən qısa müddət sonra isə onlar yenidən açılacaq. FİFA rəsmisi qeyd edib ki həm yerli mədəniyyətə hörmətlə yanaşmağa, həm də içki qəbul etmək istəyən futbolsevərlər üçün uyğun şərait yaratmağa çalışırlar. Bundan

başqa artıq qeyd etdiyimiz kimi oyun vaxtı stadionda spirtli içkinin satışı mümkün olmadığından FİFA-nın əsas sponsorlarından olan ''Budvayzer''in yalnız sıfır faizli pivələrinin satışı həyata keçiriləcək.