Vanda Nara: “İkardi üçün bundan artıq nə edim?”
“Qalatasaray”ın böyük ümidlərlə PSJ-dən birilliyə icarəyə götürdüyü Mauro İkardinin həyat yoldaşı və meneceri Vanda Nara vətəni Argentina mətbuatına diqqətçəkən açıqlamalar verib.
"Football-plus.az" xəbər verir ki, bu dəfə bu xanım adəti üzrə şəxsi həyatından yox, Mauronun karyerasından danışıb. Onun “Qalatasaray”la PSJ-ni bir-birinə bənzətməsi diqqətdən qaçmayıb. Xatırladaq ki, bu qalmaqallı cütlük Türkiyəyə gələndən qısa müddət sonra Vanda Maurodan ayrıldığını bildirərək Argentinaya yola düşdü və indiyə qədər də orda yaşayır. İkardi bu yaxınlarda həyat yoldaşı ilə barışmaq üçün Argentinaya yollanmış, amma istəyinə çatmayaraq kor-peşman İstanbula qayıtmışdı.
Ötən həftə isə məşhur futbolçu “instaqram”da canlı yayın açaraq Vandanın özünü bütün dünyada gülüş obyektinə çevirdiyini bildirmişdi. Qeyd edək ki, 29 yaşı forvard “Cim-Bom”da 2 rəsmi oyunda 118 dəqiqə meydanda olsa da, qol və ya məhsuldar ötürmə ilə fərqlənməyib. Argentina mətbuatının iddiasına görə, Vanda artıq özündən 14 yaş kiçik olan yeni sevgilisi, 22 yaşlı reper L-Gante ilə münasibətlərini gizlətmir. Onlar bir-birinin layihələrində iştirak edir və çox səmimi şəkildə paparatsilərə yaxalanırlar. Naranı dinləyək:
“Həmişə transfer zamanı başqa şəxslər özlərini ortaya atır. Vasitəçi rolunu oynamaq istəyirlər. Amma Mauronun Türkiyəyə transferi zamanı yeganə vasitəçi mən oldum. Yalnız mən! Haqqımda istədiklərini söyləyə bilərlər. Amma gördüyüm iş ortadadı. Hər zaman ən yaxşısını etməyə çalışmışam. İkardinin karyerasının sürətlə geriyə getməsi haqda deyilənlərlə razı deyiləm.
Mövsümün əvvəlində yeni kluba yollanmaq və yeni macəraya başlamaq istəyirdi. Onun üçün meydana çıxıb futbol oynamaq hələ də hər şeydən önəmlidi. İndi getdiyi klubla ayrıldığı klub arasında ciddi bir fərqin olduğunu düşünmürəm! İkardinin karyerasının qaydasında olması üçün əlimdən gələni etmişəm. Bundan artıq nə etməliyəm?! Bir dənə o qalıb ki, butsları geyib mən də meydana çıxım. Mənim işim onun üçün ən sərfəli təklifi tapıb üzə çıxarmaq idi ki, bunu da etdim. İndi Argentina yığmasına dəvət alan oyunçuların yarısından çoxunun heç bu cür sərfəli müqaviləsi yoxdu! Bir daha deyirəm ki, Mauro yaxın keçmişdəki kimi yenidən dünyanın ən mükəmməl forvardlarından birinə çevrilər bilər. Hər şey özündən asılıdı. Mən onun sənəd işləri üçün əlimdən gələni etdiyim kimi, o da meydanda əlindən gələni etməlidi”.
Digər xəbərlər
