"Sumqayıt"ın azarkeşləri uğursuzluğa görə kimi günahlandırır? - AÇIQLAMA
"Sumqayıt" Aleksey Başqa ilə yolları ayırb, onun boşaltdığı posta Samir Abbasovu gətirdi.
Böyük ümidlər bəslənilən təcrübəli mütəxəssisin əsaslı dəyişikliklər edəcəyi gözlənilirdi. Onun komandaya gəlişindən qısa müddət keçsə də, müəyyən irəliləyiş görünməkdədi. Lakin bu yalnız qol vurmaq baxımından olub. Komanda ilk 9 turda 2 dəfə fərqlənmişdisə, son iki oyunda 2-si "Neftçi"nin, 2-si də "Şamaxı"nın qapısına olmaqla 4 qol vurub. Lakin "Sumqayıt" hələ də qələbəyə həsrətdi, sonuncu pillədən uzaqlaşa bilmir.
Maraqlıdı, komandanın azarkeşləri bu durumun nə qədər çəkəcəyini düşünür? Onlar "Sumqayıt"ın zəif çıxışına nə qədər dözəcək? Problemi baş məşqçidə, rəhbərlikdə, yoxsa futbolçularda görürlər? Bu suallarla "Sumqayıt"ın azarkeş qrupu olan "Kimyaçılar 50"nin rəhbəri Sənan Mirzəyevlə əlaqə saxladıq. Onun "Football-plus.az" saytına açıqlaması belə oldu:"Komandadan çox şey gözləyirik. Samir Abasovun gəlişi də çox şeyi dəyişib. Dəyişməyən futbolçular, komandadı. Məncə, hazırkı problemlərin səbəbi nə baş məşqçidə, nə də rəhbərlikdədi. Problem futbolçularla bağlıdı. Rəhbərlik yüksək səviyyədə, Samir Abasovu da hamı yaxşı tanıyır, potensialına bələddi. Ona görə də hazırda problem oyunçularla bağlıdı. Futbolçu əzmkarlıq göstərmirsə, vuruşmursa, oyuna 3 xal üçün çıxmırsa, komanda qələbə qazana bilməz. Başqa heç bir problemimiz yoxdu. Belə görünür ki, legionerlər hələ "rels"ə düşə, komandaya uyğunlaşa bilməyiblər. Legioner yerli oyunçudan güclü olmalıdı. Lakin bizdə hələ belə deyil. "Neftçi" ilə oyunda "Sumqayıt" çox gözəl çıxış etdi. Lakin "Şamaxı" ilə görüş heç birimizi qane etmədi. Komanda qol vurmaq problemini həll edib. Amma eyni zamanda qollar da buraxır. "Şamaxı"nı aşağılamaq istəmirəm, gənc və gözəl kollektivdi. Biz bu oyuna sırf 3 xal qazanmaq üçün getmişdik. Lakin rəqib çox rahat qollar vurdu. Bütün mövqelərdə problemlərimiz var. Biz bunun 2023-cü ilə kimi davam edəcəyini ehtimal edirik. Qış fasiləsindən sonra Samir Abasov yeni futbolçular cəlb etməli, komandanı düzəltməlidi. Yəni, ən pis halda belə olacaq. Amma yenə də qış fasiləsinə kimi komanda bacardığını ortaya qoymalıdı".
ŞAİR ABDULLA
Digər xəbərlər
