Son 6 gündə MHL-də keçirilən oyunlarla bağlı çoxlu maraqlı məqam olsa da, yer məhdudiyyətinin nəzərə alıb, bəzilərini təqdim edirik.

“Pittsburq” – “Sietl” oyunu (2:3) meydan sahiblərinin kapitanı Sidni Krosbi üçün əlamətdar oldu. 35 yaşlı kanadalı 2 (1+1) xalla yadda qaldı. Beləcə məhsuldar ötürmələrinin sayını 900-ə çatdırdı. İndi onun hesabında ümumilikdə 1423 (523+900) xal var. Krosbiyə qədər yalnız 19 hokkeyçi 900 məhsuldar ötürmə həddinə çatmışdı.

Cari mövsümdə hədsiz zəif təsir bağışlayan, ardıcıl 4 məğlubiyyətdən sonra noyabrın 8-də “Edmonton”u məğlub edən “Vaşinqton”un qələbəsi düşərgədə bir adamı daha çox sevindirdi. Paytaxt klubunun forvardı Aleksandr Oveçkin MHL-də qol sayını 788-ə çatdırmaqla snayperlər cədvəlində 2-ci pillədə qərarlaşan Qordi Houya (801) çatmaq yolunda növbəti addımı atdı. 37 yaşlı rusiyalı, sadəcə, 13 qola ehtiyac duyur. Maraqlıdı ki, Oveçkin artıq 163 qapıçını məyus edib. Sonuncu qurban “Edmonton”un 24 yaşlı kiperi Stüart Skinner oldu.

Qələbə və məğlubiyyət sayında klub rekordü müəyyənləşdirənlər də var. Srağagün “Toronto”nu məğlub edən “Veqas” ardıcıl qələbələrinin sayını 8-ə çatdırdı. Bu hələ ki cari mövsümün rekordudu. Ümumiyyətlə, “Veqas” klub tarixində 4-cü dəfə belə qələbə seriyası yaxalayıb. Elə həmin gün “Filadelfiya”ya uduzan “Sent-Luis” də özünəməxsus “rekord” müəyyənləşdirdi. Bu komanda indiyə qədər heç vaxt ardıcıl 8 oyunda məğlub olmamışdı.