Oveçkin Yaqra, Mettyus hamıdan tez 40-a çatdı
MHL-də son 5 gündə keçirilən oyunların iki qəhrəmanı varsa, heç şübhəsiz, biri Aleksandr Oveçkindi.
“Vaşinqton”un kapitanı komandasının “Sietl”i məğlub etdiyi oyunda 1, “Kalqari”ni məğlub etdiyi oyunda 2 qol vurdu.
36 yaşlı rusiyalı bununla da müntəzəm çempionatda qol hesabını 766-ya çatdırdı. İndi o snayperlər siyahısında Yaromir Yaqrla 3-cü yeri bölüşür. Rekordçu Qretskinin hesabında 894, Hounun hesabında isə 801 qol var. Beləliklə, Houya çatmaq üçün 35 qol vurmaq lazımdı. Yox, Oveçkin Qretskini də arxada qoymaq istəyirsə, 129 qol vurmalıdı.
Əfsanəvi çexiyalı hokkeyçi Yaqr MHL-in rəsmi saytına açıqlamasında Oveçkinin Qretskiyə çatmaq ehtimalından danışıb:
“Oveçkinin snayperlər cədvəlində Qretskini arxada qoyması qaçılmazdı. Əvvəllər də bunu demişəm. Aleksandrın klubla beşillik müqaviləsi var. Düşünürəm ki, o, rekordu daha erkən qıra bilər. 2017/8 mövsümündən sonra bir müddət yaxşı təsir bağışlamasa da, sonradan oyun üslubunu dəyişdi və əvvəlki səviyyəsinə qayıtdı. Ovi hər mövsüm 50 qol vura bilər. Onun zərbələri möhtəşəmdi. Rusiyalı hokkeyçini yalnız zədə dayandıra bilər. Bunun üçün də hansısa bədbəxt hadisə baş verməlidi. Yoxsa Oveçkin adi zərbə nəticəsində zədə alan hokkeyçilərdən deyil”.
Xatırladaq ki, Oveçkin 2005-ci ildən “Vaşinqton”un şərəfini qoruyur.
“Toronto”nun “Kolambus”la oyunda fərqlənən forvardı Oston Mettus cari mövsümdə 40 qol həddinə hamıdan tez çatdı. 24 yaşlı amerikalı ardıcıl 3-cü mövsümdə bunu bacarır. Mettyus dünən “Sietl” üzərində qələbəyə 3 qolla töhfə verməklə cari mövsümdə xal hesabını 75-ə (43+32) çatdırdı.
Ceyson Robertson isə “Dallas”ın tarixinə düşdü. 22 yaşlı amerikalı klub tarixində ardıcıl iki oyunda het-trik etməyi bacaran ilk hokkeyçidi. Forvard “Vinnipeq” (4:3) və “Minnesota” (6:3) ilə oyunlarda het-trik etdi.
Digər xəbərlər
