Misli premyer-liqasının 13-cü turuna yekun vurulub.

Son matçda "Qarabağ" "Kəpəz"i məğlub edib - 3:1. Oyundan sonra gəncəlilərin baş məşqçisi Tərlan Əhmədovun mətbuat konfransı keçirilib. Sizi mütəxəssisin fikirləri ilə tanış edirik:

- “Qarabağ”a qarşı xüsusi planınız var idi?
- Xüsusi plan yox idi. Futbolçulara demişdim ki, rəqib oturuşmuş kollektivdi. Biz isə 5 ayın komandasıyıq, mən də cəmi 2 aydı, burdayam. Çalışıram ki, komanda inamlı futbol göstərsin. Qışa qədər bilməliyəm ki, nə var, nə yox. Əks-hücumlarda sürətli olmalı, alınmasa pozisiyalı hücum qurmalı idik. Komandamın gücünə bələdəm. Rəqibin də rotasiyalar edəcəyini gözləyirdik. Sadəcə, inamlı futbol oynamağa çalışdıq.

- Komanda normal futbol göstərsə də, əhvalınız yaxşı görünmür...
- Məğlubiyyət olmalıdı ki, inkişaf edəsən. Belə oyunlarda hakimlər daha diqqətli olmalıdı. Hər bir futbolçu əziyyət çəkir. Bu, yerə vurulanda baş məşqçiyə təsir edir. İkinci qol sınma nöqtəsi idi. Orada Elçin Əlicanovu itələdilər, hakim VAR-a baxmadı. Birinci hissədə futbolçuya dirsəklə zərbə endirilir, hakim deyir ki, təsadüfdü. Belə təsadüf olmur. Hakim qərarlarına görə əsəbi idim. Bir komandaya 12 tura 26 sarı, 4 qırmızı vərəqə verilməsi çoxdu. Təsadüf varsa, bizim də hansısa epizodumuz təsadüf olsun. Həm maliyyə baxımından hamıdan zəifik, həm yeniyik, çalışırıq ki, nəsə edək. VAR sistemi varsa, ədalətli olsun, heç bir komandanın haqqı yeyilməsin. Görünən odu ki, bəzi hallarda zərbə dəyir.

- Rauf Əliyev deyib ki, Tərlan Əhmədovun mənimlə problemi var idi və məni mənasız yerə qovdu...
- Açıqlamanı oxumuşam. Mənim heç kimlə prinsipim yoxdu. Qızıl vaxtımızı boş şeylərə xərcləməyək. Qərarı vermişəm. Nizam-intizam mənim üçün ilk növbədə vacibdi. O, özünü ifşa edib. Deyib ki, məşqdə hansısa gənc futbolçunun üstünə qışqıra bilərəm. Kim söhbətə gəlmək istəyirsə, gəlsin. Futbolçu özünü ifşa edirsə, müzakirə etmək ehtiyac yoxdu. Mənim başıma elə şeylər gəlib ki, açıqlasam, gərək Azərbaycan futbolu dayansın.

- Rauf Əliyev ikinci komandada oynayır. Göndərilməməsi nə ilə bağlıdı?
- Bu məsələni klub rəhbərliyinə ünvanlayacam. 2005-06-ci illərdən olan futbolçulara penaltidən qollar vurursa, mənə lazım deyil. Akademiyanın bütün oyunlarına gedirəm. Neçə dəfə baxmışam, penaltidən qol vurur. Belə futbolçu mənə lazım deyil.

- Əli Səmədovun heyətə qayıdacağını demişdiz...
- Bütün oyunları izləyirəm. Əlinin çıxışı da diqqətimdədi. Hələ istədiyim kimi görmədiyim üçün fasilə vermişəm. Yaxın günlərdə bir neçə futbolçu əvəzedici heyətdə olacaq. Həm oyun praktikasına, həm də nizam intizam məsələlərinə görə. Ondan sonra baxacağıq.