Serxio Peres doğma məkanda – Meksikada keçirilən mərhələdə finişə 3-cü çatmaqla fəxri kürsüyə qalxdı.

Football-plus.az xəbər verir ki, “Red Bull” pilotu son müsahibəsində yarışı dəyərləndirib, həmçinin gələn il Maks Ferstappeni qabaqlamaq üçün növbəti cəhdə əl atacağını vəd edib.

- Serxio, ev trassında ardıcıl ikinci il fəxri kürsüyə qalxdız. Bu nəticədən nə dərəcədə razısız?
- Mexikoda podiuma qalxmaq həmişə çox xoşdu. Düşünürdüm ki, bu dəfə daha yüksək yer tuta bilərəm, ancaq bunun üçün pits-stopu yaxşı keçirmək lazım idi. Ancaq son nəticədə 2-ci yer ilə 3-cü yer arasında elə bir xüsusi fərq yoxdu. Axı onsuz da podiuma qalxdım və yarış boyunca mənə möhtəşəm dəstək verən azarkeşləri gördüm. Bu mərhələni fəxri kürsüdə başa vurduğuma görə şadam.

- Yarışın ilk dövrəsi haqda danışın. Corc Rasselli ötmək nə dərəcədə vacib idi?
- İlk dövrədə mövqeyimi yaxşılaşdırmalıydım. Corcu ötə bildim, ardından Maksla Lüis Hemiltonun arxasınca düşdüm. Yetərincə erkən “Medium” təkərlərinə keçdim ki, Lüisi qabaqlaya bilim, təəssüf ki, pit-stop uğursuz alındı. Trassa “Ferrari”nin arxasında qayıtdım və çox vaxt itirdim. Düşünürəm ki, bu da Lüisi qabaqlamağıma mane oldu. Onun “Hard” təkərləri ilə problem yaşadığını gördüm, bu mənim üçün imkan aça bilərdi. Ancaq hər dəfə Hemiltona yaxınlaşanda maşınımda nəsə qızmağa başladı - əyləc, mühərrik, təkərlər... Bu üzdən həlledici hücumu həyata keçirmək üçün real imkanım olmadı.

- Şarl Lekleri 5 xal arxada qoymaqla şəxsi hesabda 2-ci pilləyə yüksəldiz. Bu mübarizədə təşəbbüsü ələ keçirdiyinizi hiss edirsizmi?
- Hər yarışda vəziyyət dəyişir. İndi sadəcə, son iki mərhələyə qatılmaq və qalib gəlmək istəyirəm. İtirəsi nəyimsə yoxdu, ona görə də imkanım daxilində olan hər şeyi edəcəm. Mexikoda həftəsonu bir çox problem üzündən çox çətin alındı. Ancaq bütün problemlərin öhdəsindən gələ bilsək, irəliyə doğru daha bir addım atmaq mümkün olacaq.

- Bu mövsümdən hansı dərslər götürdüz?
- Komanda mövsümü əla keçirdi, mən isə yarış tempini artırmalıyam. Ötən il təsnifat mərhələsinə böyük diqqət yetirmək lazım idi. Amma yeni nəsil maşınları ilə bir-birimizlə sıx mübarizə apara bilirik. Son bir neçə yarışda komandanı və maşını daha yaxşı anlamağa başlamışam. Hesab edirəm ki, düzgün istiqamətdə irəliləyirik.

- Sosial şəbəkələrin zəhərli təsiri haqda nə deyə bilərsiz?
- Adamların yalnız ictimai əhəmiyyətli fiqur olduğuna görə kimisə və ya onun ailəsini təhqir etməyi özünə rəva bilməsi çox ağrıdıcı məqamdı. Belələri anlamırlar ki, bizim də hisslərimiz var. Düşünürəm ki, bütün bunları dayandırmaq lazımdı. Biz, idmanımız paylaşımlara görə məsuliyyət daşımalıyıq. Bütün pilotların çoxlu izləyicisi var, idmanı düz yola çəkmək çox vacibdi. “Formula-1”in müəyyən dəyərləri var, ancaq biz bununla bağlı daha çox iş görməliyik. Ümumilikdə sosial şəbəkələr get-gedə daha zəhərli olur.

- Ferstappenin komanda yoldaşı olmaq xoşunuza gəlirmi?
- Maksın tərəfdaşı olmaq əla çağırışdı. O, ilk məşqdən başlayaraq yarış həftəsi boyunca çox yüksək səviyyədə çıxış edir. Ondan öyrənməyə, onu qabaqlamaq imkanı tapmağa çalışıram. Əlbəttə, bu çox çətindi. Düşünmürəm ki, bu komandaya gələn kimsə dərhal onu qabaqlaya bilər. Maks komanda ilə əla yola gedir. O birinci il deyil ki, “Red Bull”un şərəfini qoruyur, mən isə hər il ona yaxınlaşıram. Gələn il Maksı qabaqlamaq üçün daha bir cəhd edəcəm. Görək alınırmı...

ORXAN