Sənan Qurbanov “Qarabağ”la bağlı bədbinliyə əsas görmür - AÇIQLAMA
Avropa Liqasında qrup mərhələsinin 5-ci turuna yekun vuruldu.
“Qarabağ” səfərdə “Nant”a məğlub olmaqla işini çətinə saldı. Amma tribuna verdiyimiz Sənan Qurbanov bədbinlik üçün əsas görmür: “Bilirdik ki, “Qarabağ” üçün çətin səfər matçı olacaq. “Nant” Bakıdakı məğlubiyyətin əvəzini çıxmağa çalışacaqdı. Rəqib düşərgənin oyunöncəsi açıqlamalarını oxumuşdum. Çox iddialı danışırdılar. Başa düşürdülər ki, müəyyən şansları var və bundan istifadə etməyə çalışdılar. Görüş ilk dəqiqələrdən “Qarabağ”ın diqtəsi altında keçdi. 15-ci dəqiqəyə qədər təmsilçimiz topu rəqibə vermirdi. Hətta bir neçə qol vəziyyəti yaratmağı da bacardıq. Təəssüf ki, fərdi səhvdən qapımızda top gördük. Amma ağdamlılar oyundan qopmadı. “Nant” həmin ərəfələrdə pressinq etməyə çalışırdı. Lakin daha düşünülmüş hücumlar quran tərəf “Qarabağ” idi. Futbolçularımız fiziki cəhətdən də rəqibi üstələdi. Sadəcə, son dəqiqələrdə buraxılan qol hamımıza pis təsir etdi. İstənilən halda, hələ də şans qalıb. Hər şey ağdamlıların öz əlindədi. Ümid edirəm ki, evdə “Frayburq”u məğlub etməklə bütün suallara aydınlıq gətirəcəklər. “Nant”ın “Olimpiakos”la necə oynayacağını da bilmək olmaz. Dəqiq deyil ki, fransalılar orda xal və ya xallar qazanacaq. Lakin “Qarabağ” Bakıdakı matçda öz şansından maksimum yararlanmalıdı. Püşkatmadan sonra da bilirdik ki, komandamız çətin qrupa düşüb. Rəqiblər iddialı ölkələrin təmsilçiləridi. Almaniya, Fransa və Yunanıstan çempionatlarının səviyyəsi premyer-liqamızdan yüksəkdi. “Qarabağ”ın bu qrupda Konfrans Liqasının pley-offunu təmin etməsi də böyük uğurdu. Təbii ki, istəyimiz qrup ikincisi kimi yola Avropa Liqasında davam etməkdi. Komanda Çempionlar Liqasının pley-offunda uduzanda hamımız çox təəssüflənmişdik. Lakin Avropanın ən nüfuzlu klub turnirinə vəsiqə qazanılsaydı, “Barselona”, “Bavariya” və “İnter” kimi nəhənglərlə mübarizə aparacaqdı. Belə olan halda, yəqin ki, avrokubok macəramız erkən bitəcəkdi. İndi isə yolumuza davam edirik. Bilirik ki, pley-offda Çempionlar Liqasından gələn qrup üçüncüləri də olacaq. “Qarabağ”ın onlarla mübarizə apara biləcəyinə inanıram. Sevindirici haldı ki, avrokuboklar həftəsi hələ də davam edir”.
İSMAYIL XEYRULLAYEV
Digər xəbərlər
