Ötən gün xəbər verdiyimiz kimi “Kəpəz” – “Səbail” matçını izləyənlər arasında Gəncənin icra başsçısı Niyazi Bayramov da var idi.

İcra başçısı ilk hissəni VİP-lojada izləsə də, fasilədən sonra azarkeşlərin arasında oturmağı lazım bildi. Onunla yanaşı Milli Məclisin deputatı Müşfiq Cəfərov, “Kəpəz”in kuratoru İsgəndər Cavadov, “sarı-göylər”in Müşahidə Şurasının sədri İlqar Nadiri də Tərlan Əhmədovun çalışdırdığı komandanın böyükhesablı qələbəsinə şahidlik etdilər.

Matçdan sonra Niyazi bəy jurnalistlərin suallarını cavablandırdı.

- Bu günkü oyunla bağlı fikirlərinizi bilmək istərdik...
- “Kəpəz” bu gün yaxşı oyanadı.

- Futbolla yaxından maraqlanırsız?
- Əlbəttə ki, maraqlanırıq. Bu yaxınlarda klub rəhbərliyi ilə görüşümüz oldu.

- Növbəti matçlarda da sizi stadionda görə biləcəyik?
- Mütləq iştirak edəcəyik. Ayağımız yüngün oldu, bundan sonra da gələcəyik.

- Şəhərin icra başçısı kimi “Kəpəz”ə bağlı gələcək planlarınızı bilmək istərdik.Komandaya hansı köməkliyi göstərməyi planlaşdırırsız?
- Birinci növbədə stadionu təmir etmək lazımdı. İnsanların rahatlığı üçün şərait olmalıdı. Monitor, işıqlandırma sistemi yoxdu. Düzdü, meydan yaxşıdı. Ancaq ümumi şərait o qədər də ürəkaçan deyil.

- Gələcəkdə bunlar düzələcək?
- Sözsüz ki, düzələcək. Bilirsiz ki, gəncəlilər futbolu çox istəyir. Gəncədə azarkeş də çoxdu.

- Birinci hissəni VİP-lojada, ikinci yarını azarkeşlərin arasında izlədiz. Ab-havani hiss etmək üçün bu addımı atdız?
- Təbii ki, öz istəyimlə bunu etdim. Başqa cür ola bilməz.

RƏŞAD