Bu günlərdə Gəncə şəhər İcra Hakimiyyətinin başçısı Niyazi Bayramov şəhər stadionunda olub.

Bayramov klubun İdarə Heyətinin sədri İlqar Nadiri, qurumun üzvləri – millət vəkili Müşfiq Cəfərov, Gəncə şəhər Gənclər və İdman Baş İdarəsinin rəisi Həmid Nəsirov, eləcə də əsas komandanın baş məşqçisi Tərlan Əhmədov ilə görüşüb. Görüşdə nələrin müzakirə olunduğunu və bizi marqaqlandıran başqa suallara cavab tapmaq üçün İlqar Ndiri ilə danışmağı lazım bildik.

- Srağagün Gəncənin icra başçısı Niyazi Bayramov stadiona baş çəkib. Görülən işlərlə tanış olub, İdarə Heyətinin üzvləri ilə görüşüb. Görüşdə nələr müzakirə olundu?
- İcra başçısı stadionda gedən tikinti ilə maraqlndı. Arenanın ümumi vəziyyəti ilə tanış oldu. Görülən işlərlə bağlı ümumi məlumat verdik. Bildiyiniz kimi, akademiyanın tikintisi davam edir. Bundan başqa, iki təbii örtüklü meydan salınır. İş icraçıları da orda idi, onlar da Niyazi müəllimə ətraflı məlumat verdilər.

- Əsas məsələ stadionun qəzalı vəziyyətdə olan tribunalarıdı. Bununla bağlı Niyazi bəy nə dedi?
- Bizim üçün insan sağlamlığı çox önəmlidi. Bu üzdən icra başçısı Fövqalədə Hallar Nazirliyinə qadağanın götürülməsi ilə bağlı hansısa tapşırıq verə bilməz. Azarkeşlərimiz bizim üçün çox vacibdi. Ancaq onların sağlamlığını da düşünməliyik. Bir neçə variant üzərində fikirləşirik. İnşallah, düşündüklərimizin qısa müddətdə həllini tapacağına inanırıq.

- Sirr deyilsə, varinatlar nədi?
- Birinci variant qəzalı vəziyyətdə olmayan tribunaların aşağı hissələrinə məhdud sayda azarkeş buraxmaqdı. İkinci variant metal konstruksiyadan əlavə tribuna quraşdırmaqdı. Və nəhayət, sonuncu varinat qəzalı tribunanın sökülüb, yenisini inşa etməkdi. Bunlardan hansının məqəsədəuyğun olduğu barədə düşünürük.

- İcra başçısının yeni baş məşqçinin gəlişindən sonra stadiona baş çəkməsi təsadüfdü, yoxsa hadisələrin axarı belə alındı? Niyazi müəllimin Tərlan Əhmədovla da görüşdüyü barədə məlumat yayılıb.
- Başçının stadiona baş çəkməsini baş məşqçi ilə əlaqələndirmək düzgün olmazdı. Klubun yeni İdarə Heyəti formalaşdı. Bir gün öncə Milli Məclisin deputatı Müşfiq Cəfərovu stadiona baxışa dəvət etmişdim. Birlikdə arenanı gəzdik, tikinti ilə tanış oldu. Müşfiq müəllim orda bildirdi ki, başçıya da müraciət edəcək ki, gəlib stadionda görülən işlərlə yerində tanış olsun. Yəni məsələ belə olub. Niyazi müəllimin gəlişinin yeni baş məşqçi ilə heç bir əlaqəsi yoxdu. Şəhərin Gənclər və İdman Baş İdarəsinin rəisi Həmid Nəsibovun da fikri var idi ki, başçını stadiona dəvət edib aparılan işlərlə tanış etsin. Əslində, bu səfər əvvəlcədən planlaşdırılmışdı. Sadəcə, müəyyən işlərə görə yubandı.

- Rauf Əliyevin “Kəpəz”dəki gələcəyi taleyi necə olacaq? Bizdə olan məlumata görə, Tərlan Əhmədov onu komandada görmək istəmir.
- Rauf Əliyevin 5 oyunluq cəzası olduğuna görə məşqçilər korpusu onun formasını itirməməsi üçün əvəzedici heyətdə məşq edib oyunlarda iştirak etməsini istəyib. Etiraf edək ki, həm futbolçu, həm də klub üçün çox ağır cəzadı. Raufla bağlı yenilik olsa, klubun mətbuat xidməti açıqlama yayacaq.

- Forvardın “ikinci” komandaya göndərildiyini söylədiz. Əldə etdiyimiz bilgiyə əsasən, Rauf əvəzedicilərdə məşq etmir. Ümumiyyətlə, baş məşqçi ilə aralarında yaşanan qalmaqaldan sonra Gəncəni tərk edərək Bakıya dönüb...
- Onun əvəzedicilərin məşqinə qatılmamasının səbəbi odu ki, “ikincilər” Qəbələyə oyuna getmişdilər. Həmin qarşılaşmadan sonra məşqçilərin proqramına əsasən “ikincilər”ə bir neçə gün istirahət verilib. İnanırıq ki, Rauf növbəti məşqdə meydanda olacaq.

RƏŞAD