Nəhayət, Roman Pavlyuçenko çoxdan gözlənilən addımı atıb. Rusiya yığmasının sabiq hücumçusu karyerasını başa vurub.

Football-plus.az xəbər verir ki, 40 yaşlı Roman bu barədə özü açıqlama verib. Əslində Rusiya çempionatının 2-ci liqasında çıxış edən “Znamya”nın oyunçusunun qərar gəlməsi üçün ciddi səbəb olub. Pavlyuçenko 17-ci turun oktyabrın 19-da keçirilən “Kosmos”la oyununda (0:4) rəqib oyunçuya qarşı fiziki təzyiq cəhdinə görə meydandan qovulub. Meydanı tərk edəndən sonra metal arakəsməyə təpiklə zərbə endirib. Sonra isə rəqib oyunçu Artyom Kuzini təhqir edib. Nizam-İntizam Komitəsi bu hərəkət və davranışlarına görə Romana 8 oyunluq cəza və 10 min rubl cərimə kəsib.

Bundan sonra insidentlərin səbəbkarı yaşıl meydanla vidalaşmaq qərarına gəlib. Pavlyuçenko bu cəzaya əhəmiyyət vermədiyini, sadəcə, bundan sonra futbol oynamaq fikrində olmadığını deyib.

Dekabrın 15-də 41 yaşını tamamlayacaq Pavlyuçenko karyerası ərzində “Dinamo” (Stavropol), “Rotor”, “Spartak”, “Tottenhem”, “Lokomotiv”, “Kuban”, “Ural” və “Ararat”ın (Moskva) da formasını geyib. “Znamya”da 2020-ci ildən çıxış edən hücumçu 2003-12-ci illərdə Rusiya yığmasında 51 oyuna 21 qol vurub. O, AÇ-2008-in bürünc mükafatçısıdı.