Fuzal üzrə Çempionlar Liqasının əsas mərhələsində çıxış edən “Araz-Naxçıvan” dünən ilk oyunda “Orebro”ya uduzmaqla işini çətinə saldı.

Halbuki İsveç çempionu ilə qarşılaşmada çoxları Naxçıvan təmsilçisini favorit qismində görürdü.

Matçdan sonra baş məşqçi Joze Alesio Da Silva federasiyanın saytına verdiyi açıqlamada da işlərini çətinə saldıqlarını etriaf edib. Komanda niyə favorit olduğu oyunda uduzdu? Qarşısına “dördlər finalı”na çıxmaq tapşırığı qoyulan “Araz Naxçıvan”ın qələbə qazanmasına nə mane oldu? Bu suallara cavab tapmaq üçün ölkənin dəyişməz şempionunun vitse-prezidenti Mahmud Sadıqovla əlaqə saxladıq. Hazırda komanda ilə birgə Bosniya və Hürsoqovinada olan klub rəsmisi “Football-plus.az” saytına açıqlamasında bunları söylədi:

“Bəli, oyunun favoriti “Araz-Naxçıvan” idi. Öz səhvlərimizdən inanılmaz qollar buraxdıq. Demək olar, qələbəni rəqibə hədiyyə etdik. Bilmirəm, məşqçi düz taktika seçmədi, yoxsa “dördlük”lərin seçimində səhvə yol verdi... Bilmirəm, nə oldu. Onu deyim ki, rəqib bizdən güclü deyildi. Növbəti oyunlara köklənməliyik. Hələ ki şansımız var. Bu gün axşam çox suallara aydınlıq gələcək”.

RƏŞAD