“Hazırda eniş yaşayırıqsa, deməli, nəyisə düz etmirik” - Nail Kərimov
“Qəbələ”nin son turda “Kəpəz”, ondan əvvəl isə “Şamaxı” ilə bərabərə qalaraq önəmli xallar itirməsi kuluarlarda söz-söhbətlərin yayılmasına səbəb olub.
Hətta bəzi mətbu orqanlarda “qırmızı-qaralar”ın uğursuzluğuna səbəb kimi komanda daxilində fikir ayrılığının yaşandığını qeyd olunur. Yazılanlara inansaq, bəzi futbolçular Elmar Baxşıyevin oyun fəlsəfəsini qəbul etmədiyindən bilərəkdən potensiallarından aşağı çıxış edirlər.
Yayılan söz-söhbətlərə aydınlıq gətirmək üçün bölgə təmsilçisinin baş meneceri Nail Kərimovla danışmağı lazım bildik. Klub rəsmisi “Football-plus.az” saytına açıqlamasında söylənilənlərə belə münasibət bildirdi:
“Oyunda bir neçə futbolçu potensialından aşağı çıxış edərsə, zəif təsir bağışlayarsa, onda bu mövzuda danışa bilərik. Ancaq istər “Kəpəz”, istərsə də “Şamaxı” ilə matçlarda komanda ümumilikdə zəif çıxış etdi. Bəli, son iki oyunda önəmli xallar itirdik, ancaq dünyanın sonu deyil. “Kəpəz”lə görüşə Qəbələdə hazırlaşmışdıq. Məşqlərdə hamı bir nfər kimi can-başla məşq edirdi. Komandanın hazırlıq səviyyəsini bilmək üçün məşqləri izləmək lazımdı. Yenə deyirəm, məşqlərdə hamı verilən tapşırıqları lazımi qaydada yerinə yetirirdi. Fikrimcə, futbolçular Gəncə klubu ilə oyuna köklənə bilmədilər. Düşərgədə başqa problem yoxdu. İstər məşqçilər korpusu, istərsə də rəhbərlik üzrəinə düşəni yerinə yetirir”.
Qarşıdakı üç turda “Qəbələ”ni çətin oyunlar gözləyir. Həftəsonu “qırmızı-qaralar” “Sabah”ın qonağı olacaqsa, ondan sonra öz meydanında “Zirə”ni qəbul edəcək. 14-cü turda isə Elmar Baxşıyevin komandası Bakıda “Neftçi” ilə üz-üzə gələcək. Hazırda enişdə olan komandanın çətin sınaqlardan necə çıxacağı da maraqlıdı. Ancaq Nail bəy heç bir rəqibdən çəkinmədiklərini bildirdi:
“Son iki oyun göstərdi ki, premyer-liqada zəif komanda yoxdu. O ki qaldı qarşıdakı üç oyuna, xatırlayırsızsa, komanda ötən il də bir müddət “qara zolağ”a düşdü. Ancaq geridönüş edə bildik. İnanıram ki, “Qəbələ” bu dəfə də bacaracaq. Hazırda eniş yaşayırıqsa, deməli, nəyisə düz etmirik. Çatışmazlığı üzə çıxarıb yenidən yolumuza davam etməliyik”.
RƏŞAD
