"Zirə" rəhbərliyi azarkeşlərdən dəstəyini əsirgəmir” - AÇIQLAMA
Premyer-liqanın son turunda "Qartallar" fanklubunun azsaylı üzvləri "Turan Tovuz"la səfər matçında "Zirə"ni tək qoymamışdı.
Football-plus.az xəbər verir ki, tribunada yerini tutan azarkeşlər sevimli komandalarını sona qədər dəstəklədilər. Görəsən, onların Tovuza səfəri özlərinin, yoxsa klubun təşəbbüsü ilə baş tutub? Bu suala aydınlıq gətirmək üçün klubun azarkeşlər üzrə əlaqələndiricisi Elgün Cəfərliylə əlaqə saxladıq:"Tovuza səfərimiz həm azarkeşlərin, həm də klubun birgə təşəbbüsü ilə gerçəkləşdi. "Zirə" rəhbərliyi azarkeşlərdən dəstəyini əsirgəmir. "Turan Tovuz"la matçda təxminən 35-45 azarkeşimiz vardı. Biz istidə, soyuqda, istənilən hava şəraitində komandamıza daim dəstək olmuşuq, bundan sonra da olacağıq. Amma Tovuz şəhər stadionunda projektorların olmaması heç xoş deyil. Günəşin istisində futbolçuların top qovması və azarkeşlərin komandalarına dəstək olması üçün maneə, əlavə yorğunluqdu. Düşünürəm ki, "Turan Tovuz" rəhbərliyi bu məsələni tezliklə həll etsə, daha yaxşı olar".
ABDULLA İSMAYILOĞLU
