"Meydanda bir nəfər az olmağımız hiss olunmadı" - Mahmud Qurbanov
Misli premyer-liqasında 8-ci tura start verilib.
İlk oyun günündə "Səbail" "Qəbələ"yə uduzub - 1:2. Matçdan sonra paytaxt təmsilçisinin baş məşqçisi Mahmud Qurbanovun mətbuat konfransı keçirilib. Sizi mütəxəssisin fikirləri ilə tanış edirik:
"Oyuna yaxşı başlamışdıq. Epizodlarda rəqibdən üstün idik. Qələbə qazanmaq istəyirdik. Çünki, qələbəyə ehtiyacımız var idi. Birinci hissənin sonunda azlıqda qalmağımız bizi çətin vəziyyətə saldı. İkinci hissədə azlıqda olmağımıza baxmayaraq, komanda istəkli idi. Heç də oyundan qopmadıq. Meydanda bir nəfər az olmağımız hiss olunmadı. Hesabı bərabərləşdirə bildik. İkinci qolu da vura bilərdik. Əfsuslar olsun ki, fərdi olaraq qərarlarımız düzgün deyildi. Matçın sonunda qol buraxmaq əlbəttə ki, üzücüdü. Yaxşı mübarizə apardıq. Amma rəqib daha təcrübəli idi. Əllərinə düşən imkanlardan istifadə etdilər. Son dəqiqələrdə meydanın mərkəzində top itirmək haqqımız yox idi. Həmin hücum da qapımızda qolla nəticələndi. Amma komanda şəklində oyunçulardan razıyıq. Məğlub olmağı istəməzdik. Heç-heçə ən yaxşı nəticə olardı. Təəssüf ki, olmadı".
- Bir neçə futbolçunu əvəzedici heyətə göndərmisiz. Bunun səbəbi nədi?
- Kardoza, Ədilxan və Kizitonu B komandaya göndərdik. Orda oynadılar. Bu gün də heyətdə yox idilər. Futbolçular özlərindən əvvəl komandanın nəticələrini düşünməlidilər. Bizim üçün yerli və ya legionerin fərqi yoxdu. Komandaya xeyir vermək lazımdı. Əgər xeyirləri dəymirsə, əvəzedici komandada oynayacaqlar.
- Qırmızı vərəqədən sonra Cabir Əmirli müdafiənin mərkəzində oynadı və pis təsir bağışlamadı. Gələcək oyunlarda ona bu mövqedə şans verməyi düşünürsüz?
- Müdafiənin mərkəzində boşluqlar var. Bəli, Cabir yaxşı oynadı. Heç də Qustavo və Kardozodan pis deyildi. Nihad Qurbanlının da əsas heyətdə ilk rəsmi oyunu idi. Onun da yaxşı çıxış elədiyini düşünürəm. İnamlı, cəsarətli idi. İlk oyunu olmasına baxmayaraq, qorxmadı. Çalışacağıq ki, əlimizdə olan futbolçulardan istifadə edək. Müdafiənin mərkəzində kimin oynayacağına baxacağıq. Amma Qustavo dəqiq oynamayacaq. Çünki, qırmızı vərəqə aldı.
- Bir mərkəz müdafiəçisi əvəzedici heyətə göndərilib, digəri isə qırmızı vərəqə alıb komandanı pis vəziyyətdə qoydu. Bunu necə şərh edərdiniz?
- Bunun şərhi yoxdu. Bilərəkdən elədiyini deməzdim. Hər ikisi təcrübəlidir, gənc deyillər. Biri Argentina Premyer Liqasında, biri isə Portuqaliya I Divizionunda oynayıb. Onlar öz təcrübələri ilə müdafiənin mərkəzini toxunulmaz saxlamalıdılar. Əfsuslar olsun ki, bunu görmürük. Görünür hardasa çatışmazlıqları var. Çalışacağıq ki, növbəti oyunlarda daha qəti qərarlar verək. Gələn oyunlarda müdafiənin mərkəzində dəyişikliklər ola bilər.
- Bəzi əsas heyət oyunçuları ehtiyatda idi. Bunun səbəbi nədi?
- Bizdə əsas heyət, ehtiyat heyət yoxdu. Bu gün meydanda olan futbolçuların yaxşı olduğunu düşündüm. Franko Mazurekin 3-4 gün əvvəl qızdırması var idi. Bir mədədə iştirak etmədi. İkinci hissədə meydana buraxmaq istəyirdik. Amma qırmızı vərəqə planlarımızı pozdu.
- Mirabdulla Abbasovun faydalı iş əmsalı sizin fikrinizcə nə qədərdi?
- Mirabdullanın bir ildi ki, oyun praktikası yoxdu. Şans vermək istəyirik. Yerli futbolçudu. Futbolçunu itirmək asandı. İstəyirik ki, özünü sübut etsin ki, onu unutmaq hələ tezdi. İş əmsalına gəldikdə futbolçuların qərarları düzgün deyil. Mirabdullanın düzgün qərar verməməsi qapımıza ikinci qolla nəticələndi.
- Komanda qol vəziyyətləri yaratmaqda da çətinlik çəkir. Bunun səbəbi nədi?
- Hücumda zəiflik olduğunu deməzdim. Hər oyunda qol epizodlarımız olur. Sadəcə istifadə edə bilmirik. Qol vəziyyəti yarada bilirik, amma sonuncu ötürmədə qərarlar düzgün olmadığından yararlana bilmirik. Hücum xəttimiz pis deyil.
Digər xəbərlər
