Misli premyer-liqasında 7-ci tura start verilib.

"Səbail" "Neftçi"yə məğlub olub - 0:2. Matçdan sonra meydan sahiblərinin çalışdırıcısı Mahmud Qurbanovun mətbuat konfransı keçirilib. Sizi mütəxəssisin fikirləri ilə tanış edirik:

- Oyuna sərt başladız. Amma sonra futbolçular dayandılar. Bu, nə ilə bağlı idi?
- Demək çətindi. Çünki, biz hər dəfə futbolçulara sərt oynamağı tapşırırıq. Niyə dayandılar? Bu, əsas da ikinci hissədə göründü. Mübarizələri uduzduq, bəzi epizodlarda gecikirdik. Nə top saxlaya bildik, nə də müdafiəni qura bildik. Bu da məğlubiyyətə gətirib çıxardı. Əslində biz futbolçulara istəkli, aqressiv oynamağı tapşırmışdıq. Təəssüf ki, ikinci hissədə bunu görmədik.

- Bəlkə legionerlərdə yanılmısız?
- Bizdə stabillik çatmır. İstər yerli olsun, istər legioner. Bir oyunu yaxşı oynayırıq, o biri oyunu zəif. Bu futbolçuları özümüz bəyənib gətirmişik. Hər oyun biri yaxşı olur, biri yaxşı olmur. Bu da komandanın oyununa təsir edir. Futbolçular 90 dəqiqə tapşırdıqlarımızı yerinə yetirməlidilər. Əfsuslar olsun ki, bəzən bunu görmürük.

- Dediz ki, stabillik yoxdu. Siz gələndən sonra komandanı sıfırdan yığmısız. Bundan irəli gələ bilər?
- Bəhanə etmək üçün çox variantlar var. Ən asan iş uduzanda bəhanə etməkdi. Biz komandanın içindəyik, bilirik səbəb nədi. Düzəltmək istəyirik. Əsas problemimiz odu ki. hər oyun qol buraxırıq. Rəqibin qələbəyə layiq olmadığını demək istəmirəm. Amma hərdən öz diqqətsizliyimiz ucbatından qapımızda qol görürük.

- Əsas heyətə düşməkdə çətinlik çəkən futbolçular var. Onları əvəzedici komandaya göndərmək istəmirsiz?
- Biz hələ ki, B komandamıza heç bir oyunçu vermirik. Amma düşünürəm ki, bu oyundan sonra bəzi futbolçuların əvəzedici heyətdə çıxış etməsinə qərar vermək lazımdı.

- Kimlərin milli komandaya seçilmək potensialı var sizcə?
- Hər məşqçi istəyər ki, komandasında millinin oyunçuları çox olsun. Hamıya şans veririk. Özlərindən asılıdır. Nə qədər yaxşı oynasalar, milli komandaya çağırılmaq şansları da çoxdu. "Səbail"dən milliyə nə qədər çox oyunçu çağırılsa, biz ancaq sevinərik.

- Hücum futbolu oynayırsız. Amma iki dayaq yarımmüdafiəçisi ilə bu, nə dərəcədə uyğundu?
- Əslində iki dayaq yarımmüdafiəçisi ilə oynamaq uyğundu. Bunun hücum futboluna təsiri yoxdu. Əsas odur ki, topla yaxşı rəftar edəsən və hücuma komanda şəklində çıxa biləsən. Bu, birinci hissədə var idi, cinahlarımız yaxşı idi. Dayaq yarımmüdafiəçilərinin biri mərkəzdə qalmalıdı, biri hücuma çıxmalıdı. Bunu həmişə deyirik.

- Mərkəz hücumçusu mövqeyində sıxıntı çəkdiyinizi düşünürsüz?
- Bu gün hücumda problem var idi. Zakpa ötən oyunda zədələnmişdi. Ona görə də bu gün oynamırdı. Kizitonun da əvvəldən zədələri var idi, hələ də tam sağalmayıb.Mirabdullada komandaya gec qoşulub, hazır deyil. Bu gün Samiri yoxladıq. Birinci hissədə pis deyil. O, yarımmüdafiəçidi, amma bu gün hücumda sınadıq.