Musa Qurbanlı pokerə görə fərqli hisslər keçirir
Bazar günü “Qarabağ” səfərdə “Zirə”ni darmadağın etdi - 7:1.
Görüşün qəhrəmanı, sözsüz, Musa Qurbanlı oldu. Hücumçu poker etdi. Bu, Azərbaycan çempionatları tarixində 38-ci belə nəticədi. Oyundan sonra futbol ictimaiyyəti Musanın performansından danışırdı. Təbii ki, gənc forvardın premyer-liqada 7 qol vurması təqdirəlayiq haldı. Bu səbəbdən də Canni de Byazi onu milliyə də dəvət etdi.
Görüş və poker etməsi ilə bağlı fikirlərini öyrənmək üçün Musa Qurbanlıyla əlaqə saxladıq: “Çempionat oyunları bizim üçün çox vacibdi. Üç gündən bir meydana çıxırıq. Avropa Liqasında olduğu kimi, çempionat oyunları da bizim üçün vacibdi. Hazırda çempionatda gərgin mübarizə var. Bu il maraqlı və baxımlı yarış izləyirik. Bu səbəbdən də bizim üçün hər oyun çox vacibdi. Bütün görüşlərdə 3 xal qazanmağı qarşıya məqsəd qoyuruq. “Zirə” ilə oyunda da qələbə qazanmaq bizim üçün çox vacib idi. Şükürlər olsun ki, 3 xal əldə etdik. Yaxşı mübarizə aparıb, çox vacib qələbə qazandıq”.
Musa pokerə imza atması ilə bağlı isə bunları söylədi: "Əsas komandada olmasa da, birinci divizionda poker etmişdim. "Qarabağ"ın əvəzedici komandasında çıxış edərkən bunu bacarmışdım. Əlbəttə, bunu əsas komanda ilə premyer-liqada etməyin yeri başqadı. Fərqli hisslərdi. Şükürlər olsun ki, vurduğum qollarla komandama kömək etdim. Qarşıma məqsəd qoyuram ki, hər oyunda vurduğum qollarla komandama xeyir verim. Düzdü, kimin fərqlənməsinin o qədər də fərqi yoxdu. Əsas odu, qələbə qazanaq. Amma yenə də qol vuranda, qələbədə yaxından iştirak edəndə daha xoş olur".
İLKİN SULTANLI
