Misli premyer-liqasında 7-ci tura yekun vurulub.

"Qarabağ" "Zirə"ni darmadağın edib - 7:1. Oyundan sonra ağdamlıların baş məşqçisi Qurban Qurbanovun mətbuat konfransı keçirilib. Sizi çalışdırıcının fikirləri ilə tanış edirik:

- Musa Qurbanlı çempionatın bombardiridi? Sizcə, o, milli üçün hazırdı?
- Hələ “Qarabağ” üçün tam hazır olmalıdı, sonra milli üçün. Bu barədə fikir bildirə bilmərəm. Yığmanın öz idarəediciləri var.

- Ozobiçdən sonra illərdi, yerli bazardan legioner transferi görmürük. Digər klublarda diqqətinizi çəkən oyunçular varmı?
- Hər futbolçunun öz müqaviləsi var. O vaxt şans düşdü, istifadə etdik. Yerli çempionatdakı futbolçuları da izləyirik. Bəyəndiyimiz oyunçular da var. Kimləsə bağlı fikir bildirsək, düzgün çıxmaz. Ancaq nəzarətimizdədi.

- “Zirə”yə 7 qol vurduz. Bu nəticəni növbəti turun "Neftçi" ilə oyunu üçün ismarıc kimi görürsüz?
- Xeyr. “Neftçi” barədə düşünmürük. Futbolçularımızı oyundan oyuna daha yaxşı hazırlaşdırmaq barədə fikirləşirik. “Neftçi” ilə matça var. Təəssüf ki, bütün futbolçularla hazırlaşa bilməyəcəyik. Bu oyunun ona heç bir aidiyyatı yoxdu.

- Dediz ki, Musa hələ “Qarabağ” üçün hazır olmalıdı. Bu gün əlinə düşən bütün imkanlardan yararlandı. Hazır olmaq üçün nə etməlidi?
- Qol vuran futbolçuya maraq çox olur. Bu gün 4 qol vurması tam hazır olması demək deyil. Mənim üçün vacib olan stabil göstəridilərdi. Hazırlıq mərhələləri var, bunların hamısını keçməlidi. Burda çempionat, avrokubok oyunları var. Psixoloji amil vacibdi. Gündən günə inkişaf varsa, yaxşılığa doğru gedir. Öz üzərində çox çalışmalıdı. Məşqçilər olaraq bütün oyunçuların idman formasını yaxşılaşdırmaq istəyirik.

- “Nant”la oyundan sonra “Qarabağ”ın yorğun, ağır olacağı gözlənilirdi. Meydanda əksini gördük...
- Bu gün də rotasiyalar etmişdik. Çox da uğurlu alındı. Bu, mənə inam verir. Avrokubokda yaxşı səviyyədə oynamaq üçün çempionatda yaxşı oynamalıyıq. Bütün oyunçular yaxşı motivasiya olunmuşdular. Avropada az oynayan futbolçular çempionat oyunlarını gözləyirlər. Buna sevinirəm. Hər məşqçinin öz düşüncələri var. Yorğunlua barədə çox düşünmək istəmirik. Bəzən bu, qaçılmazdı. İnsan robot deyil. Müəyyən həddə qədər getmək olur. Yorğunluq olmamasına çalışsaq da, bəzən bu, qaçılmazdı.

- Millinin oyunlarının komandanın formadan düşməsinə səbəb olmayacaq? Milliyə gedənlərin arasında zədələnənlər də ola bilər...
- Neqativ yanaşmayaq. Bəzi oyunçulara istirahət çox vacibdi. Əlimizdə 3-4 futbolçu qalır. Digərləri 3-4 gündən bir oynayacaq. Legionerlərimiz arasında da gedənlər olacaq. Oyunçularımız çox yükləmədə olacaqlar. İstərdim ki, 10 gün bir yerdə olsunlar. Edəcək bir şey yoxdu.

- Hücum xətti üçün azad agentlərə baxırsız?
- Bizdə baxış daim gedir. Nə vaxt alınsa, istifadə edəcəyik.