Aftandil Hacıyevin “Qarabağ” – “Nant” oyunu ilə bağlı proqnozu - AÇIQLAMA
"Qarabağ" bu gün Avroliqanın qrup mərhələsi çərçivəsində "Nant"ı qəbul edəcək.
Ağdam təmsilçisi meydana ciddi itkilərlə çıxacaq. Bununla belə, səfər sindromu yaşayan Fransa klubunu Bakıda məğlub etmək mümkündü.
"Football-plus.az" saytı olaraq "Qarabağ" – “Nant” oyunu ilə bağlı Aftandil Hacıyevin fikrini öyrəndik:
"Qrup mərhələsinin 2-ci oyunudu. Bütün komandalar iddialıdı. "Nant" Fransa çempionatında uğurlu start götürməsə də, heyətində yetərincə təcrübəli, sürətli, hər an matçın taleyini dəyişəcək futbolçular var. Düşünürəm ki, Fransa təmsilçisi avrokubok matçlarına daha çox köklənib, nəinki daxili çempionata. Avroliqada maksimum uğurlu çıxış etməklə irəli getmək istəyirlər. "Qarabağ"ın müdafiə xəttində itkilərin olması bizi narahat edir. Amma düşünmürəm ki, "köhlən atlar" müdafiədə oturacaq. Qurban Qurbanov və yetirmələri qorxaq futbolu çoxdan unudub, onlar hazırda dinamik, sürətli, açıq futbol sərgiləyir. "Nant"la matçda da "Qarabağ"ın daha çox hücumda oynayacağı qənaətindəyəm. Axşam bizi çox gərgin, maraqlı oyun gözləyir".
ABDULLA İSMAYILOĞLU
