“Uşaq və gənclərin fiziki və mənəvi inkişafı” istiqaməti üzrə layihə çərçivəsində yazılarımız davam edir.

Növbəti müsahibimiz Qurban Qurbanovdu. Amma məşqçi Qurban Qurbanov yox, onun güləşçi adaşı. Qurban Qurbanov gənc olmasına baxmayaraq, güləşdə sözünü deməyi bacarıb. Həmsöhbətimiz dünya və Avropa çempionatlarında mükafatlar qazanmağı, fəxri kürsünün yüksək pillələrinə qalxmağı bacarıb. Onunla söhbətdə həm güləşə gəlişindən danışdıq, həm də gələcək planlarına toxunduq. Sözsüz, mövzumuza uyğun olaraq güləşə başlayarkən hansı çətinliklərlə qarşılaşdığını və bu yolda ilk addımlarını atanlara nə demək istədiyini də soruşduq.

- Qurban, əvvəlcə güləşə gəlişindən danışaq. Necə oldu güləşə gəldin? İlk məşqçin kim olub?
- Mən Kürdəmir rayonundanam. Bu rayonun Muradxan kəndində dünyaya göz açmışam. Elə güləşlə məşğul olmağa da doğma kəndimizdə başlamışam. İlk məşqçim də Şərif Səlimov olub. Güləşçi kimi ilk addımlarımı onun yanında atmışam, bu idman növünün sirlərini mənə öyrədən ilk şəxs də Şərif müəllimdi. Sonradan isə Respublika Olimpiya-İdman Liseyinə qəbul olunmuşam və həm təhsilimi, həm də məşqlərimi orda davam etdirmişəm. Sözsüz, bir idmançı kimi püxtələşməyimdə həmin liseyin və orda çalışan məşqçi-müəllimlərin də əhəmiyyətli rolu olub.

- Karyerana nəzər salanda iştirak etdiyin yarışların, qazandığın mükafatların siyahısının geniş olduğunu görürük. İstərdik ki, bu haqda özün də danışasan. İndiyə qədər hansı yarışlarda iştirak etmisən? Hansı nəticələr qazanmısan?
- Hazırda mənim 20 yaşım var və 72 kiloqram çəki dərəcəsində mübarizə aparıram. İlk ciddi uğurumu isə 2017-ci ildə qazanmışam. Həmin il yeniyetmələr arasında dünya birinciliyinin qalibi olmuşam. Mənim üçün unudulmaz olan dünya çempionatı Yunanıstanın Afina şəhərində keçirilirdi. 42 kq çəki dərəcəsində finalda ukraynalı güləşçi Gennadi Zavertaylovla qarşılaşdım. Yetərincə gərgin mübarizə alındı. Əvvəlcə 1:4 hesabıyla geri düşdüm. Lakin ruhdan düşmədim və sona qədər mübarizə apardım. Yekunda 5:4 hesabıyla qələbə qazandım və qızıl medallara layiq görüldüm. Növbəti - 2018-ci ildə həm dünya çempionatının, həm də Avropa çempionatının mükafatçısı oldum. 2019-cu ildə Bakıda keçirilən Olimpiya festivalının qalibi adını qazandım. 2020-ci ildə pandemiya hamımızın planlarını əngəllədi. 2012-ci ildə isə gənclər arasında Avropa çempionatında ikinci oldum. Eyni ildə MDB ölkələri arasında keçirilən turnirdə gümüş medalları qazandım. Həmin turnir MDB Oyunları adlanırdı. Bu il isə həm Avropa çempionatının ikincisi, həm də dünya birinciliyinin qalibi olmuşam. Romada keçirilən Avropa çempionatında finala qədər inamlı çıxış etdim. Bütün rəqiblərimə böyük üstünlüklə qalib gəldim. Təəssüf ki, həlledici qarşılaşmada macar Attila Toesmaqiyə məğlub oldum.

- Bundan sonra hansı hədəflərə çatmağı arzulayırsız?
- Mən bütün yarışlara qalib olmaq üçün yollanıram. İstər dünya çempionatı olsun, istərsə də Avropa. Sözsüz, gələcəkdə Olimpiya Oyunlarına qatılmaq və orda ölkəmizi layiqincə təmsil etmək istəyirəm. Azərbaycan bayrağını Olimpiadada yüksəltmək mənim üçün əsas hədəfdi. Yaxın planda da müəyyən hədəflərim var ki, əvvəlcə onlara çatmalıyam. Artıq məşqləri bərpa etmişik. Tezliklə 23 yaşlılar arasında dünya çempionatı keçiriləcək və mən də ora hazırlaşıram. Sözsüz, milli komandaya düşmək, Azərbaycanı təmsil etmək üçün də buna layiq olmalı, rəqabətdən qalib çıxmalıyam. Buna görə də ən yaxın hədəfim kimi komandaya düşməyi göstərərdim.

- Qurban, güləşlə məşğul olmağa başlayarkən hansı çətinliklərlə qarşılaşdın?
- 2012-ci ildə 4-cü sinifi bitirdim və Respublika Olimpiya-İdman Liseyinə qəbul olunmuşam. Ən böyük çətinlik də həmin vaxt qarşıma çıxdı. Yaşımız xeyli az idi, evdən uzaq düşmək bizim üçün xeyli çətin oldu. Bizim üçün yeni mühit, hətta deyərdim ki, yeni bir ailə idi. Qarşılaşdığım ən böyük çətinlik kimi bunu deyə bilərəm. Evdən ötrü darıxırdım. Sözün düzü, mənim üçün əsas çətinlik bu idi. Allaha şükür, başqa bir çətinlik çəkməmişəm, məşqlərə böyük həvəslə qatılmışam, öz üzərimdə daim çalışmışam.

- Təhsil və idman bir araya sığırmı? İdmanla məşğul olmaq oxumağa mane olurmu?
- Bəli, etiraf etmək lazımdı ki, idmanla məşğul olmaq oxumağa müəyyən qədər mane olur. İkisini bir arada aparmaq xeyli çətindi. Mən Respublika Olimpiya-İdman Liseyini bitirmişəm, daha sonra da İdman Akademiyasına qəbul olunmuşam. Amma diqqətimi daha çox məşqlərimə, idmana ayırıram. Çalışıram ki, öz sahəmə, idmana aid kitablar oxuyum, boş vaxtlarımda mütailə edim. Amma bunu tam enerji ilə etmək, böyük zaman ayırmaq imkanı olmur.

- Yaşın az olsa da, güləşdə müəyyən yol keçib, özünə uyğun təcrübə qazanmısan. Hətta ciddi problemlərin öhdəsindən gəlmisən. Güləşdə ilk addımlarını atanlara və onların valideynlərinə nə demək istərdin?
- Mən daha çox valideynlərə üzümü tutmaq istəyirəm. Uşaqları tanınan, bu sahədə müəyyən dəsti-xətti olan məşqçilərin nəzarətinə vermək lazımdı. Qoy uşaqlar güləşin sirlərini onlardan öyrənsinlər. İndi hərə bir diplom alıb, müxtəlif klublarda məşq keçməyə başlayırlar. Elə adamlar var ki, heç güləşin incəliklərindən xəbərdar deyillər. Uşaqları onların yanına göndərirlər, amma məşqçi o uşaqdakı potensialı aşkarlaya bilmir, onu idmandan soyudur. Belə etmək olmaz. Məhz bunun nəticəsidi ki, istedadlar itib-batır, onlara aşkar edib, Azərbaycan idmanına qazandıra bilmirik. Potensialı olan uşaqlar məhz bacarıqlı mütəxəssisin nəzarətində inkişaf etməlidi. Əgər uşaqda potensial yoxdusa, məşqçi vaxtında valideyni xəbərdar etməlidi, həmin uşağı başqa sahəyə yönəltmək lazımdı.

- Sonda sənə özəl bir sual vermək istərdim. Adaşın Qurban Qurbanov Azərbaycanda xeyli məşhurdu. Onunla qarşılaşmısanmı? Nə vaxtsa onun qədər məşhurlaşıb, böyük uğurlar qazanmağı hədəfləyirsənmi?
- Xeyr, “Qarabağ”ın baş məşqçisi Qurban Qurbanovla heç vaxt qarşılaşmamışam, hansısa ünsiyyətimiz olmayıb. Qurbanova Azərbaycanda çox yaxşı münasibət var, hamı tərəfindən sevilir. Bunu da azarkeşləri, xalqımızı sevindirməklə qazanıb. Gələcəkdə mən də onun kimi tanınmış, sevilən mütəxəssis olmaq istərdim.

İLKİN SULTANLI