Birinci divizionda çıxış edən "Zaqatala"nın aşağı yaş qrupları üzrə komandaları çempionatlarda çıxışını dayandırıb.

Buna səbəb isə maliyyə dəstəyinin olmamasıdı. Məsələ ilə bağlı daha detallı bilgi almaq üçün "Zaqatala"nın baş məşqçisi Rüstəm Məmmədovla əlaqə saxladıq:

"Komandalarımız fəaliyyətini dayandırmayıb. Hamısı yerindədi və məşqləri davam etdirirlər. Sadəcə, maliyyə dəstəyi gəlmədiyindən çempionatlarda çıxışımızı dayandırmışıq. Bilirsiz ki, klubumuzun büdcəsi arzulanandan çox aşağıdı. Hazırkı büdcəylə əsas komandanı güclə saxlayırıq. Zaqatala İcra Hakimiyyətindən və ya şəhərimizin imkanlı şəxslərindən dəstək olsaydı, aşağı yaş qrupları üzrə komandaların çempionatda çıxışını təmin etmək olardı. Hətta nəqliyyat xərcləri qarşılansaydı, bəzi yaş qrupları üzrə komandalar çıxışını davam etdirərdi. “Allahdan ümid kəsilməz” deyirlər. Yaxın günlərdə sponsorlar tapılsa, yəqin ki, hansısa komandamızın çempionatda çıxışı bərpa oluna bilər"

ABDULLA İSMAYILOĞLU