“Ayaks” Antonini satmağa məcbur oldu - TƏHLİL
“Mançester Yunayted” “Ayaks”ın 22 yaşlı vingeri Antoninin transferini açıqlayıb.
Nüfuzlu media qurumları və insayderlər kosmik transfer məbləğindən bəhs edir – 100 milyon avro (95+5). Bu, Niderland çempionatı tarixində satış rekordudu.
MY bir “transfer pəncərəsi”ndə alış məbləğinə görə klub rekordunu yeniləyib. Artıq 225 milyon funt xərcləyən mankunianlar əvvəllər 150 milyondan yuxarı qalxmamışdı. Antoni bu yayın 5-ci transferidi. Ona qədər komandaya Tirell Malasia, Kristian Eriksen, Lisandro Martines və Kazemiro gəlmişdi. Hələ “Nyukasl”dan qapıçı Martin Dubravkanın da bu kampaniyaya qoşulacağı gözlənilir.
Yeni baş məşqçi Erik ten Haq iyundan bəri rəhbərlikdən yaxşı tandığı vingerin transfer olunmasını xahiş edirdi. “Ayaks” isə liderlərindən biri ilə vidalaşmaq fikrində deyildi. “De Telegraaf”a inansaq, amsterdamlılar mançesterlilərin ən azı üç ciddi təklifini geri çevirib. Sonuncu təklifdə 90 milyon avro rəqəmi yer almışdı. “Ayaks”ın baş məşqçisi Alfred Şryoder şayiələri belə şərh etmişdi:
“Güman edirəm ki, klub Antonini satmayacaq. İndi ağlagəlməz pullar verirlər, ancaq daha bir oyunçumuzu satsaq, sevinməyəcəm. Maliyyə baxımından hər şey yaxşıdı. Antonini anlayıram. Ancaq sən “Ayaks”ın şərəfini qoruyursan və biz Çempionlar Liqasında oynayırıq. Düşünmürəm ki, MY bununla öyünə bilər”.
Göründüyü kimi, “Ayaks” braziliyalını saxlaya bilmədi. Və burda söhbət təkcə puldan getmir.
Antoni buraxılmasını istədi
Bəlkə də “Ayaks” hər yeni təklifi geri çevirməyə hazır idi, ancaq məsələyə futbolçu özü qoşuldu. O, məşhur insayder Fabritsio Romanoya verdiyi müsahibədə, nəhayət, buraxılmasını istədi:
“Klub rəhbərliyi ilə görüşdə yenə məni buraxmalarını xahiş etdim. Bu dəfə masanın üzərində daha ciddi təklif var. “Ayaks” imtinanı belə əsaslandırır ki, mənə əvəzedici tapmaq üçün cəmi 5 gün var və bu müddətdə yaxşı variant tapmaq çətindi. “Ayaks”dan, sadəcə, məni buraxmağı xahiş etmirəm. Bir erediviziya oyunçusu üçün rekord sayılacaq qiymətə satılmağımı xahiş edirəm. Fevraldan bəri bunun üzərində dayanmışam. “Transfer pəncərəsi” dövründə görüşlərimiz davam edib. “Ayaks”dan müqavilə müddətini uzatmaqla bağlı təklif almışam. Ancaq bir daha anlatmışam ki, getmək istəyirəm. Adamlar məni dinləməli və anlamalıdılar ki, motivasiyam məni xoşbəxtliyə aparır. Mənə ən yüksək səviyyədə çıxış etmək lazımdı”.
Problem ondadı ki, “Ayaks” həqiqətən də Antoniyə əvəzedici tapmayıb. “De Telegraaf” yazır ki, amsterdamlılar imkan daxilində ucuz qiymətə “Çelsi”dən Hakim Ziyeşi qaytarmağa çalışıb. Londonluların futbolçuya görə 37 milyon avro tələb etməsi ilk baxışdan “Ayaks”ın gözünü qorxudub. Ancaq Antoninin satışından sonra pul var, yəni Ziyeşin dönüş ehtimalı artıb.
“Ayaks”da ilyarım oynadı
“Ayaks” 2020-nin qışında 19 yaşlı Antonini “San-Paulu”dan 20 milyon avroya (üstəgəl bonus şəklində 5 milyon) aldı. Nə qədər qəribə olsa da, niderlandlılar onu məhz Ziyeşin əvəzedici kimi almışdı – cəmi ilyarım sonra dairə tərsinə fırlanır.
Heç də hamı belə bahalı transferə sevinmirdi. Marko van Basten sınanmış lider əvəzinə sirli yeniyetmə üçün bu qədər pul xərclənməsinə görə klub rəhbərliyini açıq şəkildə tənqid etmişdi:
“Ayaks”da adamların ağzı böyükdü: deyirlər ki, möhtəşəm akademiyamız var, ancaq sonra gənc oyunçu üçün böyük məbləğ xərcləyirlər. Nəsə qaydasında getmir. Sinənə döyüb akademiyanı tərifləyirsənsə, gənc braziliyalını 25 milyona almaq absurddu. Akademiyası “Ayaks”ın əsas dəyəridi, pulu isə gəncləri yönəldəcək adama xərcləmək lazımdı. Gənclərlə başqaları arasında balans olmalıdı”.
Ancaq Antoni bütün bu tənqidlərə fikir vermədi. Artıq bir il sonra nəhənglər onunla maraqlanmağa başladı – PSJ və Leonardo “Ayaks”ı hamıdan çox sıxırdı. Braziliyalını buraxmaqdan imtina edən Ten Haq rəhbərlikdən hətta ən kosmik məbləğləri belə geri çevirməsi istəmişdi. Ten Haq ötən ilin noyabrında braziliyalıya tərif yağdırırdı:
“Qeyri-adi oyunçudu. Antoni oyun planında hələ böyüməlidi. Onunla söhbətdə demişəm ki, asan oyunlarda da güc qoymalıdı. Antoni top səviyyəli rəqiblərlə oyunlara köklənir. Ancaq hər həftə ÇL-də və ya PSV-yə qarşı oynamır ki. Belə davam etsə, ona maaşının yarısını vermək lazımdı. Antoni hər oyunda can qoymaldı”.
Düzdü, Antoni bu il ÇL-də oynaya bilməyəcək. Ancaq premyer-liqada da onu böyük rəqiblər və ciddi sınaqlar gözləyir.
Digər xəbərlər
