Bakıda təlim-məşq toplanışını başa vuran U-18 millimiz bu müddət ərzində Türkiyə ilə 2 yoldaşlıq oyunu keçirdi. Komanda ilk matçda 0:1 hesabı ilə məğlub oldusa, ikinci görüş qolsuz bitdi.
U-18-in baş məşqçisinin təlim-məşq toplanışı ilə bağlı fikrini öyrəndik. Görəsən, Aqil Nəbiyev komandanın çıxışından razı qalıb? Onun "Football-plus.az" saytına açıqlaması belə oldu:
"Avqustun 23-31-i aralığında Bakıda toplanışımz oldu. Bu müddətdə Türkiyə ilə 2 oyunda gücümüzü sınadıq. Əsas heyətdən 9 nəfər yox idi. Bəziləri U-19 millisinə dəvət almışdı. Bir futbolçumuz "Neftçi"nin əsas üzvü olduğuna görə müəyyən danışıqlardan sonra düşərgəyə qoşula bilmədi. Rusiya və Almaniyada yaşayan bəzi azərbaycanlı futbolçular var idi ki, heyətdə yer ala bilməmişdilər. Ümumilikdə 9 nəfər yığmanın düşərgəsinə qoşulmadı. Buna baxmayaraq, yeni futbolçular dəvət etmişdik. Məşqləri taktiki gedişlər üzərində qururuq. Hələ U-19 çempionatı başlamadığı üçün futbolçular rəqibdən geri qalırdı. Lakin yenə də keyfiyyətli futbol oynadıq. Oyunçulardan taktiki gedişlərin yüz faizini ala bilməsək də, demək olar ki, razı qaldıq. Hər iki matçda qol imkanları yaratsaq da, dəyərləndirə bilmədik. Futbolçuların ustalığı çatmadı. Amma rəqibə də çox qol şansı vermədik. İkinci oyunda Amin Qarayev qırmızı vərəqə aldı. Bununla, təbii ki, planlarımız pozuldu, çox dəyişiklik edə bilmədik. Qələbə qazana bilməsək də, Türkiyə kimi təcrübəli komanda ilə oyunlar növbəti toplanışda futbolçular üçün motivasiya olacaq. Komandanın əzmkarlığından tam razı qaldım. Təbii ki, taktiki, futbolçuların keyfiyyəti baxımından müəyyən sıxıntılar var. Bunu aradan qaldırmaq lazımdı”.
Gənc mütəxəssis U-18-in planlarını da açıqladı:
“Növbəti toplanışı oktyabra planlaşdırırıq. Hələ ölkənin adını dəqiq bilməsək də, yoldaşlıq oyunlarımız olacaq. Bu uşaqların beynəlxalq təcrübəsi, demək olar, sıfıra bərabərdi. Avropa görməyiblər, orda oynamayıblar. Amma çalışırıq, AFFA bu yöndə işlər görür. Yavaş-yavaş uşaqları inkişaf etdirib istədiyimiz nəticəni əldə edəcəyik".
ŞAİR ABDULLA