Misli premyer-liqasında 4-cü turun növbəti görüşü keçirilib.

"Neftçi" "Zirə"ni qəbul edib. Meydan sahibləri görüşdən 2:1 hesablı qələbə ilə ayrılıb. Oyundan sonra qonaqların baş məşqçisi Rəşad Sadıqovun mətbuat konfransı keçirilib. Mütəxəssis fikirlərini bölüşüb:

O, jurnalistlərin suallarını da cavablandırıb:

- Təmin Xəlilzadə və İlkin Muradovun bağışlanması gözlənilir?

- Yaxın müddətdə gözlənilmir. Amma gələcəkdə ola bilər ki, birlikdə işləyək. Mən onlara hörmətsizlik etməmişəm. Sadəcə olaraq gedişat bunu tələb edirdi və mən o addımı atmışam. Söhbət səhvin böyüklüyündən, kiçikliyindən getmir. Söhbət məsələnin davamiyyətli olmasından gedir. Hər hansı məsələ düzəlmirsə, artıq tədbir görmək lazımdı. Biz də tədbir gördük. Ola bilər ki, onlar gələcək karyeralarında bu məsələni aradan qaldırsınlar və biz də bir yerdə çalışaq.

- Bildirdiz ki, qapınız qarşısında yaranan epizodlar qolla nəticələnir. Bunu aradan qaldırmaq üçün hansı çıxış yolunu düşünürsüz?
- "Sabah"la oyunun ilk hissəsində iki epizod qolla nəticələndi. Bu gün qapımıza iki təhlükəli zərbə qolla bitdi. "Makkabi" ilə matçda iki zərbə qolla nəticələndi. Mövsüm ərzində belə halla baş verir. Sən qol epizodu yaradırsan, vura bilmirsən, sənə qarşı olan epizodlar isə qolla nəticələnir. Belə məqamda səbrli olmaq lazımdı. Uzun marafondu. Xüsusilə də bu il oyunların sayı çoxdu. Mövsümün əvvəlidi. Futbolçuların demək olar ki, əksəriyyəti optimal formada deyil. Bu, başadüşüləndi. 7-8-9-cu turlardan sonra ideal formalarını bərpa edəcəklər.

- Cəlal Hüseynovu icarəyə verdiz, Təmkinlə İlkin transferə çıxarılıb. Özünüz də başa düşürsüz ki, yerli futbolçularla nəticə qazanmaq çətindi?
- Yerli futbolçularda oyun baxımından heç bir problem yoxdu. Ötən mövsümdə medallar uğrunda mübarizə aparan komandalardan ən çox yerli futbolçu oynadan məşqçi bəlkə də mən olmuşam. Konfrans Liqasına 8 yerli oyunçu ilə çıxmışıq. Məsələ davamiyyət, stabillikdi. Bizim yeganə problemimiz stabilliyi qoruyub saxlamaqdı, zamanla məndə də bu problem olub. Yerli futbolçulardan istədiyim odu ki, hər hansı problem olanda dərhal reaksiya versinlər. Hansısa futbolçu fikirləşirsə, biz üçüncü yeri tutduq, işimiz bitdi. Belə olmaz. Mən ümumiyyətlə ambisiyalı, qarşısına böyük hədəf qoyan idmançıları sevirəm. Əgər bir idmançı qarşısına böyük hədəflər qoymayıbsa, nəticələr davamlı olmayacaq. Potensial olaraq onları heç bir legionerdən geri hesab etmirəm. Sadəcə olaraq biz də məcburuq ki, komandada rəqabət yaradaq, heyəti genişləndirək. Mənim üçün yerli və ya legioner fərqi yoxdu. Təbii ki, milliyə namizəd gənclər görəndə onlara qayğı göstəririk. Amma onlar qarşılığını verməlidi. Qarşılığı mənim üçün 15 qol vurmaq, kuboklar qaldırmaq deyil. Hörmət istəyirəm. Özünə, işinə hörmət etməlidi. Nəticəyə ac olmaq lazımdı. Mən özüm çempion olmuşam, yenə çempionluq istəmişəm. Avrokubokların qrupunda oynamışam, yenə istəmişəm.

- İntizam Komitəsinin sizə xəbərdarlıq etməsi ilə bağlı fikriniz necədi?
- Hər hansı fikir bildirmək istəmirəm. Oyundan 2-3 saat əvvəl xəbərim oldu. Nəzərə alacağıq. Əslində oyunboyu hakimə heç bir etirazım olmayıb. Həmin vaxtda da ona görə etiraz edirdim ki, mənim fikrimcə epizoda baxılmayacaqdı. Əsas istəyim epizoda baxılması idi. Monitor qabağımızda idi. Görürdük ki, epizodun əvvəli göstərilmir. Belə görüldü ki, Rəşada etiraz etmək olmaz. Nəzərə alarıq.