"Əsas düşüncəmiz Konfrans Liqasında növbəti mərhələyə vəsiqə qazanmaqdı" - Laurentsiu Regekampf
Misli premyer-liqasında 1-ci turun görüşləri keçirilir.
"Neftçi" səfərdə "Şamaxı"ya qalib gəlib - 1:0. Oyundan sonra "ağ-qaralar"ın baş məşqçisi Laurentsiu Regekampfın mətbuat konfransı keçirilib. Sizi rumıniyalı mütəxəssisin fikirləri ilə tanış edirik:
"3 xal qazandığımız üçün sevincliyəm. Bizim üçün bir az çətin oyun oldu. Bu günkü matçda daha çox ikinci heyət üzvlərinə şans verdik. Onlar da şans qazanmalıdılar. Əsas düşüncəmiz Konfrans Liqasında növbəti mərhələyə vəsiqə qazanmaqdı. Süni örtüklü meydan olduğundan xəsarət alanlar ola bilərdi. Heyf ki, Aqil zədələndi. İndi bizim 2 qapıçımız var. Rza da millidədi. 3 xal qazandıq bu da bizim komanda üçün vacib idi".
Çalışdırıcı jurnalistlərin suallarını da cavablandırıb:
- Bu gün meydana çıxanlar pozitiv siqnal verdilər?
- Əlbəttə! Fasilədə dedim ki, onlar özlərinə güvənməlidilər. Çoxu gənc oyunçulardı. İlk dəfə bir yerdə çıxış edirdilər. Düşünürəm ki, oyundan oyuna daha da artıracaqlar və özlərinə güvənəcəklər.
- Bu heyətdən kimisə Vyanada əsas "11-lik"də görə bilərik? Mərt haqda fikirlərinizi bilmək maraqlıdı.
- Kim oynayacaq o barədə danışmaq istəmirəm. Xüsusilə də Mərt haqda. Ümumiyyətlə müdafiə xətti yaxşı oynayırdı. Mərtin keyfiyyətini bilirdik. Ona görə geri qaytardıq. Konfrans Liqasının qrupunda çıxış etmək istəyiriksə, hamı oynamalıdı.
- Yeni transferlərdən Yeqor oynayırdı. Onun haqda fikirləriniz maraqlıdı...
- Yaxşı oynadı. Mübarizə apardı. O da gənc oyunçu, döyüşçüdü. Kifayət qədər vaxt var ki, istənilən səviyyəyə çatsın.
- Aqilin vəziyyəti necədi?
- Dəqiq bilmirəm. Mənə dedilər ki, burnu qırılıb. İndi xəstəxanaya gedib. Müayinədən sonra dəqiq biləcəyik. Ümid edirəm ki, ciddi problemi yoxdu.
İLKİN SULTANLI
Digər xəbərlər
