“Leykers”in ulduz forvardı Lebron Ceymsin artıq Los-Anceles klubu ilə müqavilə müddətini 2025-ə qədər uzatdığı məlumdu.

Hələ bir ili qalan müqaviləyə daha iki il əlavə olunub. Lebron həmin ikiillik müqavilə üçün daha 97,1 milyon dollar alacaq (2023/24 mövsümündə əməkhaqqı tavanı qalxarsa, bu məbləğ 111 milyona qədər arta bilər).

Yaxın günlərdə müqavilə ilə bağlı rəsmi açıqlama da veriləcək. Dekabrda 38 yaşını tamamlayacaq basketbolçu üçün 97,1 milyon dollar inanılmaz puldu. Müqavilənin şərtinə görə, ünlü forvard 2024/25 mövsümündə Kaliforniyanı tərk edə bilər. Ohayoda doğulan ulduz belədə karyerasının 11 ilini keçirdiyi və 2016-da çempion olduğu “Klivlend”ə dönə bilər. Bu əsasən oğlu Bronni ilə eyni komandada oynamaq perspektivindən asılı olacaq. Çox güman, Lebron basketbolçu karyerasında son üç ilə qədəm qoyur. Dördqat MBA çempionu hələ də basketbola çox vaxt ayırsa da, tədricən onun çoxşaxəli biznesi ön plana çıxır. “Forbes”i qiymətləndirməsinə görə, 37 yaşlı basketbolçunun 2021-ci ildəki gəlirləri ümumilikdə 121,2 milyon (bunun yalnız 38,2 milyonu “Leykers”lə müqavilənin qazancıdı) təşkil edib, ümumi sərvəti isə milyard dollara çatıb. Bu da Ceymsin fəaliyyətdə olan və milyarderlər siyahısına düşən ilk basketbolçu olmasını şərtləndirib. İndiyə qədər milyarder olan yeganə basketbolçu Maykl Cordan bu həddə 2014-də, yəni karyerasını bitirəndən 11 il sonra çatmışdı. Ümumiyyətlə, Cordan Lebron üçün əsas orientirdi. Məhz Cordan MBA klublarından “Şarlott Hornets”in sahibidi. Liqanın sabiq basketbolçuları arasında başqa beləsi yoxdu. Çox güman, Lebron bu siyahıya ikinci kimi düşəcək. Bəzi eksperlər belə hesab edir ki, məhz Lebron Las-Veqasda qurulan yeni MBA komandasının sahibi olmağa əsas namizəddi. MBA rəhbərliyi daha bir nəhəng televiziya müqaviləsi bağlayandan sonra Las-Veqasda və Sietldə komanda yaratmağı planlaşdırır. Ceymsin yeni müqaviləsi onu bütün zamanların ən yüksək ödənişli basketbolçusuna çevirib. Lebronun karyerası boyunca toplam qazancı 532 milyon dollar olacaq. Əvvəlki rekord (508 milyon dollar) “Bruklin”in forvardı Kevin Düranta məxsus idi. “The Athletic” öz qaynaqlarına istinadla xəbər verir ki, Ceyms müqavilə müddətinin uzadılmasına razılıq versə də, “Leykers” rəhbərliyi ilə danışıqlarda klubun “Bruklin”in oyun qurucusu Kayri İrvinqi alması üçün israr edib. Lebron Rassell Uestbrukun əsas 1 nömrə kimi oyunundan narazıdı, bu üzdən cari mövsümlərarası dövrdə ondan qurtulmaq istəyir. Ceymsin “Klivlend”də birlikdə çempion olduğu İrvinq isə ideal əvəzedicidi. Kayri və Lebron dostluq edir, yenidən eyni komandada oynamaq hər biri üçün möhtəşəm olardı. Çox güman, “Leykers” İrvinq naminə Uestbruku qurban verəcək. Ancaq “Bruklin” buna razı olacaqmı? Hər şey “Bruklin”in Kevin Dürantı saxlaya bilib-bilməməsindən asılıdı.

Hələ ki “Leykers”in güclənmə qrafiki titul uğrunda mübarizəyə dönəcəyinə dəlalət etmir. “Gölməçəsevərlər” azad agent qismində mərkəz oyunçuları Demian Cons və Tomas Brayant, həmçinin forvard Xuan Toskano Anderson və müdafiəçi Lonni Uoker ilə müqavilə bağlayıb.

Xatırladaq ki, heyətində Lebronla yanaşı, Entoni Devis, Uestbruk və başqalarının olduğu komanda ötən mövsüm heç Qərb konfransının ilk “10-luğ”unda da yer ala bilmədi. Amma 5-ci MBA çempionluğu Lebron üçün oğlu Bronni ilə birgə oynamaq imkanı qədər prinsipial deyil. Gələn il məktəbi bitirəcək kiçik Ceyms karyerasının davamıyla bağlı qərar verməli olacaq. Ona Cənubi Kaliforniya Universiteti, Los-Ancelesdəki Kaliforniya Universiteti, Miçiqan, Oreqon və Ohayo Steyt Universitetləri maraq göstərir.

Bronni 2023/24 mövsümünü NCAA liqasında keçirsə, 2024-ün yayında MBA draftında namizədliyini irəli sürə bilər. Bu isə o deməkdi ki, ata ilə oğulun 2024/25 mövsümündə MBA-da oynaması mümkündü. Bir-birinə qarşı və ya eyni komandada. İkinci variant Lebron üçün daha cəlbedicidi:

Bu variant “Leykers”də mümkün olmasa, Kralın karyerasındakı son mövsümü Bronni ilə birgə “Klivlend”də keçirmək istəyinə düşməsi tam mümkündü: “Kavalyers”in qapıları mənim üçün qapanmayıb. Qayıtmaq istədiyimi birbaşa deməyəcəm – mən bunun mexanizmini bilmirəm”.
Ceymsin planı gerçəkləşsə, o, MBA tarixinə oğlu ilə eyni komandada oynayan ilk basketbolçu kimi düşəcək. Belə xoşbəxtlik nə Kobi Brayanta (onun atası Co Marmelad çox yaşlı idi), nə də Maykl Cordana (onun oğulları universitetlərdə ilişib qaldı) nəsib olub.
Bronni bu yay Avropada yoldaşlıq oyunları keçirən “Kaliforniya Klab” üçün çalışır. Kiçik Ceyms Parisdə Fransanın U-18 yığması ilə oyunda parlaq dankla yadda qalıb.