MBA-da fasilə olsa da, basketbol ətrafında maraqlı hadisələr baş verməkdədi.

“Barselona”nın futbolçuları “Bruklin”in Nyu-Yorkdakı məşq mərkəzinə baş çəkib. Ferran Torres, Jordi Alba, Serxio Buskets, Pedri, Qabi və Kataloniya klubunun başqa oyunçuları basketbol meydançasında praktik vərdişləri sınaqdan keçirib. “Nets” futbolçuların hər birinə adı yazılan forma bağışlayıb. “Bruklin”in oyunçularından Ben Simmons və Patrik Mills futbolçuların yanında olub.

Bu arada beşqat MBA çempionu Mecik Conson ötən həftə dünyasını dəyişən əfsanəvi basketbolçu Bill Rassellin geydiyi 6 nömrəli formanın istifadədən çıxarılması ilə bağlı çağırış edib:

“Nyu-Orlean”ın forvardı Zayon Uilyamson isə fiziki forması ilə bağlı müntəzəm tənqid eşitməkdən narazıdı. Ona yaxın adamlar qeyd edirlər ki, daim məsxərəyə qoyulmaq 22 yaşlı basketbolçunun hisslərinə toxunur və onu qıcıqlandırır.

Uilyamson bu yay 193 milyon dollar müqabilində “Pelikans”la müqaviləsini daha 5 illiyə yeniləyib. 2022/23 mövsümündə rəmzi komandaya düşəcəyi təqdirdə isə daha artıq – 231 milyon dollar qazanacaq. Maraqlı məqam budu ki, basketbolçu müqavilədə göstərilən məbləği tam həcmdə almaq istəyirsə, çəkisi 135 kiloqramdan artıq olmamalıdı. Zayonun müqaviləsində zədə və oyun sayı ilə bağlı bəndlər də var. O, ötən mövsümü zədə üzündən boşa verib.

MBA-nın indiki simasını müəyyənləşdirən basketbolçulardan biri də Lebron Ceymsdi. “Leykers”in ünlü forvardı bü gün klubla müqavilə müddətini uzatmaq imkanından yararlana bilər. “Sporting News”un yaydığı xəbərə görə, 37 yaşlı idmançının ümumi məbləği 97 milyon dollar olan ikiillik müqavilə imzalaması mümkündü. Forvard həmçinin digər bənddən yararlana, yəni 47 milyon dollar maaş nəzərdə tutan birillik müqavilə bağlaya bilər. Lebronun “Leykers”lə 2020-də imzaladığı müqavilənin müddəti 2022/23 mövsümünün sonunda bitəcək. Onun dördqat MBA çempionu olduğunu da xatırladaq.