"Eyforiyaya qapılmırıq, sevinməyə də vaxtımız yoxdu" - Qara Qarayev
Sabah Çempionlar Liqasının pley-off mərhələsində "Qarabağ" "Viktoriya"nı (Plzen) qəbul edəcək.
Football-plus.az xəbər verir ki, bu gün görüşdən öncə keçirilən mətbuat konfransında Ağdam təmsilçisinin üzvü Qara Qarayev iştirak edib. Yarımmüdafiəçi görüş haqda fikirlərini səsləndirib:
“İşimizin ciddiliyini fərq edirik. Evdə oynayacağıq. Bu dəfə də azarkeşlərimizin etimadını doğrultmağa çalışacağıq. Ev üstünlüyümüz var. Tarixi nəticəni əldə etmək üçün əlimizdən gələni edəcəyik. "Viktoriya" pley-offa çıxıbsa, xüsusi diqqət edilməli olan nöqtələri var. Çalışacağıq ki, Bakıda 90 dəqiqə üstün oynayan tərəf biz olaq".
- Əvvəllər yay aylarında isti hava Azərbaycan klubları üçün üçün üstünlük olsa da, indi oyunçularımız da bundan əziyyət çəkirlər?
- Bizim üçün də Bakının bürküsü çətinlik yaradır. Amma ev amili bu çətinlikdən çıxmağımıza kömək olur. Neçə vaxtdı burdayıq, hava durumuna öyrəşmişik. Polşa, Macarıstanda hava daha sərin idi. Bu mənada burda oynamaq onlara daha çətin olur. Bürkünün bizə də ziyanı var. Amma ev amili bu çətinlikdən çıxmağımıza kömək olur.
- Hazırda komanda daxilində həyəcan nə yerdədi?
- İşimizə peşəkar yanaşmağa çalışırıq. Ötən qələbədən sonra azarkeşlərin çılğınlığı normaldı. Eyforiyaya qapılmırıq, sevinməyə də vaxtımız yoxdu. Baş məşqçinin növbəti oyun üçün tapşırıqlarına əməl etməyə çalışırıq. Həyəcana görə səhv etmək kimi düşüncəmiz yoxdu. Komanda yoldaşlarımızla sabahkı matçın mahiyyətini dərk edirik. Bu, bizə həyəcan yox, məsuliyyət verir. Təmsil etdiyimiz ad var, bunun məsuliyyəti ilə meydana çıxacağıq. Futbolçuların əksəriyyəti Çempionlar Liqasının himni altında meydana çıxmağı gözləyirdi.
