İkiqat olimpiya çempionu Brittni Qraynerin məhkəməsi yaxın günlərdə başa çata bilər.

Ximki Şəhər Məhkəməsində prosesin davam etdiyi və ekspertlərin dinlənildiyi məqamda Rusiya Prezidentinin mətbuat katibi Dmitri Peskov ABŞ təmsilçilərinə anlatmağa çalışıb ki, məhbusların dəyiş-düyüşünü “meqafon diplomatiyası” olmadan müzakirə etmək daha yaxşıdı. Qrayner özü, deyəsən, artıq statusuna öyrəşib və indi ilk iclaslarla müqayisədə yetərincə sakit görünür. Amerikalı basketbolçu srağagünkü prosesin gedişində qida qəbulunu da özünə rəva görüb.

Çərşənbə axşamı məhkəmə prosesi fevralın 17-də Şeremetyevo hava limanında Qraynerin əşyalarının ekspertizası ilə məşğul olan Aleksandr Korablevin sorğu-suala tutulmasıyla başladı. Korablev yükün ekspertizası ilə bağlı danışarkən basketbolçu kolbasa buterbrodunu əlinə götürüb, elə qəfəsin içindəcə yedi. Onun, adətən, konvoy otağında baş tutan naharı gözləməyə səbri çatmadı. Düzdü, yemək vaxtı da salonda danışılanlara qulaq asmaq mümkündü.

Korablevin dediyinə görə, ekspertiza iki aparatın və tərəzinin köməyi ilə aparılıb, ancaq sonda birinin nəticəsini xatırlatdı, ona görə ki, ikisi də de-fakto eynidi. Ancaq Qraynerin vəkillərindən biri Aleksandr Boykov tam eynilik olmadığı iddiası ilə mütəxəssislə razılaşmadı. Korablev isə etiraf etdi ki, kiçik səhvlər ila bilər. Ardından məhkəmə bu məsələ ilə bağlı müstəqil mütəxəssisi dinlədi. Qraynerin digər vəkili Mariya Blaqovolinanın dediyinə görə, ekspertlərin fikirləri üst-üstə düşməyib. Daha doğrusu, müdafiə tərəfinin dəvət etdiyi, 30 ildən artıq iş stajına malik olan müstəqil ekspert 3 ildi çalışan dövlət ekspertinin apardığı ekspertizanın qanunvericiliyə tam uyğun olmadığını təsdiqləyib.

Beləliklə, növbəti məhkəmə iclası avqustun 4-nə təyin olunub və Bakı vaxtı ilə 15.00-da başlayacaq. Bu dəfə tərəflər yekun dəlillərini ortaya qoyacaq.

Müdafiə tərəfi yaxın günlərdə məhkəmənin bu işlə bağlı hökm verəcəyinə inanır. Hökm bu gün olmasa da, ən yaxın iclasda oxuna bilər.

CNN teleşirkəti bugünlərdə öz mənbələrinə istinadla xəbər verib ki, Rusiya Qraynerlə sabiq dəniz piyadası Pol Uilanın (bir il əvvəl casusluğa görə 16 il həbs cəzası alıb) əvəzində təkcə silah taciri Viktor Butu yox, Federal Təhlükəsizlik Xidmətinin əməkdaşı Vadim Krasikovu da istəyir. Krasikov 2019-cu ildə çeçen döyüşçünü öldürdüyünə görə Almaniyada ömürlük həbs cəzası çəkir. ABŞ isə Krasikovun dəyiş-düyüşə qoşulması ilə bağlı fikri ciddi təklif saymır, çünki belədə prosesdə üçüncü ölkənin – Almaniyanın da iştirakı lazımdı. CNN-in hazırladığı materialda iddia olunur ki, But və Krasikovla yanaşı, siyahıda Rusiya Dövlət Dumasının deputatı Valeri Seleznyovun oğlu Romanın da adı var. Adı çəkilən şəxs kredit kartlarının bilgilərini oğurlamaqda və onlayn-fırıldaqçılıqda suçlanaraq, ABŞ-da 27 illik həbsə məhkum olunub.

Xatırladaq ki, ötən həftə həbsdə olanların, o cümlədən Qraynerin də taleyi Rusiya xarici işlər naziri Sergey Lavrovla ABŞ-ın dövlət katibi Entoni Blinkenin telefon danışığında müzakirəyə çıxarılıb. Ancaq mümkün dəyiş-düyüşdə Krasikovla Seleznyovun adının çəkilib-çəkilməməsi ilə bağlı bilgi yoxdu.

Həmkarlarımız Dmitri Peskovdan Vaşinqtonun Moskvanın dəyiş-düyüşlə bağlı cavabını qeyri-ciddi saymasına münasibət bildirməyi xahiş edib. Onun cavabı isə belə olub:

ABŞ-ın rəsmi şəxsləri hələ ki Qraynerlə Uilanın təkcə Butla dəyişdirilməsinin daha ədalətli olduğunu düşünürlər. Amerikalılar onu çox önəmli fiqur sayırlar. Rəsmi şəxlər hesab edirlər ki, Butun azad olunması üçün qətiyyətlə belə prosedurların əleyhinə çıxan Ədliyyə Nazirliyi ilə “döyüşmək” lazım gələcək. Təbii ki, Rusiyanın da bu məsələyə razılaşması asan olmayacaq. Qraynerlə Uilanın azadlığa çıxması üçün Rusiya Prezidenti Vladimir Putinin onları əfv etməsi lazımdı.