“Qarabağ” – “Ferentsvaroş” oyununun hakimlərinin qiyməti açıqlandı
Dünən Çempionlar liqasındakı təmsilçimiz “Qarabağ” 3-cü təsnifat mərhələsinin ilk oyununu keçirdi.
Komandamız Macarıstan “Ferentsvaroş”u ilə 1:1 hesablı bərabərə qaldı. Görüşdə ilk dəfə VAR sistemindən istifadə olunurdu. İsveçdən olan hakimlər briqadasının idarə etdiyi oyunda komandamızın vurduğu 2-ci qol məhz VAR-a baxıldıqdan sonra qeydə alınmadı.
Matçın hakimliyi ilə bağlı Əfqan Həmzəyevə müraciət etdik. Təcrübəli referi “Football-plus.az” saytına bunları söylədi:“İlk öncə onu deyim ki, hakimlər oyunun öhdəsindən gəldilər. Verilən qərarların 90 faizi doğru idi. Oyunun nəticəsinə təsir edən bir kobud səhv olmadı. Bütün vəziyyətlərdə bir-biri ilə əlaqəli, hakimlər komandası olaraq normal fəaliyyət görsətdilər. Oyundankənar vəziyyətlərin də, demək olar ki, 95 faizi doğru idi. Bu arada bir haşiyə çıxıb onu da deyim ki, hakimin İsveçdən olmasına, Bakıdakı hava ilə İsveçdəki havanın bir-birindən tam fərqli olmasına baxmayaraq, fiziki hazırlığı çox yaxşı idi. Normalda İsveçdə temperatur yay aylarında 25-28 dərəcədən yuxarı olmur. Amma 33-35 dərəcə istidə qaçdı, epizodlara yaxın oldu. Verdiyi sarı vərəqələrin hamısında haqlı idi. Hətta bir-iki vərəqəni verməkdə gecikdi. “Ferentsvaroş”un futbolçusu Aissa Laiduni təxminən 7-8 qayda pozuntusu etdi. Demək olar ki, bütün mübarizələrdə topu qayda pozuntusu ilə alırdı. Hətta ikinci hissədə Ozobiçi iki əllə itələyib yıxdı, 5 saniyə sonra da başqa futbolçuya qarşı “sürüşmə” fəndi edərək kobud oynadı. Lakin hakim oyunu saxlamadı. Yəni 5 saniyədə 2 dəfə qaydanı pozsa da, hakim onu cəzalandırmadı. Ona sarı vərəqə verilməli idi. Oyundankənar vəziyyətə gəlincə, “Qarabağ”ın sayılmayan qolunda ofsayd var idi. Mən özüm də ötürmə verilən anda dedim ki, oyundankənar vəziyyətdi. Artıq ötürmədən bəlli idi ki, Veşoviç, demək olar ki, bütün bədənlə öndədi. Ona görə də qərar doğrudu. VAR olmasaydı, “Qarabağ” hesabda 2:1 önə keçəcəkdi. Görüşün hakim-inspektoru olsaydım, hakimlərin işini 8,3 balla qiymətləndirərdim. Çünki hakim VAR-dan istifadə edirsə, onun balından 0,1 çıxılır. Əslində oyundankənar vəziyyətə baş hakim cavabdeh deyil. Amma burda qolu qeydə aldığına görə o da cavabdehlik daşıyır”.
ŞAİR ABDULLA
Digər xəbərlər
