Əmsalımız artsa da, mövqeyimiz dəyişmədi

Avrokubok matçlarından sonra UEFA-nın yeni reytinq cədvəli açıqlanıb. 13,875 əmsala malik Azərbaycan 29-cu pillədə qərarlaşıb.

Komandalarımız Konfrans Liqasının cavab görüşlərini 0,625 əmsalla tamamlasa da, bu böyük qazanc ölkəmizin mövqeyinin dəyişməsi üçün yetərli olmayıb. “Neftçi” “Aris”i 3:0, “Qəbələ” “Fehervar”ı 2:1 hesabıyla məğlub edərək 0,250, “Zirə” isə Təl-Əvivdə “Makkabi” ilə qolsuz bərabərlik sayəsində 0,125 əmsal gətirib.

Bununla da cari mövsümün qazancı 1,250-yə yüksəlib. Bunun yarısı – 0,625-i “Qarabağ”ın hesabındadı. Qalan komandalarımız isə ilk əmsallarını cümə axşamı əldə edib.
Azərbaycan UEFA reytinqində 28-ci olan Polşadan 1,250 əmsal geridədi. 30-cu yerdəki Sloveniya isə ölkəmizdən 1,500 əmsal geri qalır. Bu iki ölkənin avrokuboklarda hərəyə 1 klubu qalıb. “Qarabağ”ın Konfrans Liqasının qrup mərhələsinə vəsiqə qazandığını nəzərə alsaq, cari mövsüm Polşanı geridə qoymaq şansımızın real olduğunu söyləyə bilərik. Sloveniyanın isə bizi keçəcəyi inandırıcı görünmür.